തിരുവനന്തപുരം: കെഎസ്ആർടിസി എന്ന പേരിന് പേറ്റന്റ് സ്വന്തമാക്കിയ ശേഷം ആദ്യമായി കേരളത്തിന്റെ സ്വന്തം ആനവണ്ടി കർണാടകയിലേക്ക് സർവീസ് നടത്തുന്നു. കെഎസ്ആർടിസിയുടെ ബംഗളൂരൂ ബസുകൾ ഞായറാഴ്ച മുതൽ ഓടിത്തുടങ്ങും.
തിരുവനന്തപുരം, കോഴിക്കോട്, കണ്ണൂർ എന്നിവിടങ്ങളിൽനിന്നാണ് ആദ്യഘട്ടത്തിൽ ബസുകൾ പുറപ്പെടുക. തിരുവനന്തപുരത്തുനിന്നുള്ള ബസുകൾ ഞായർ വൈകീട്ടും കണ്ണൂരും കോഴിക്കോടും നിന്നുള്ളവ തിങ്കളാഴ്ചയും ആരംഭിക്കുമെന്നാണ് അറിയിച്ചിരിക്കുന്നത്. തമിഴ്‌നാട്ടിലേക്കുള്ള സർവീസിന് അനുമതിയായിട്ടില്ല.
72 മണിക്കൂർ മുന്പുള്ള ആർടിപിസിആർ. പരിശോധന നടത്തിയ നെഗറ്റീവ് സർട്ടിഫിക്കറ്റോ ഒരു ഡോസ് വാക്‌സിൻ എടുത്തതിന്റെ സർട്ടിഫിക്കറ്റോ യാത്രക്കാർ കൈയ്യിൽ കരുതണം. ടിക്കറ്റുകൾ www.online.keralartc.com എന്ന വെബ് സൈറ്റിലൂടെയും ‘Ente KSRTC’ എന്ന മൊബൈൽ ആപ്പിലൂടെയും റിസർവ് ചെയ്യാം.
