കൊച്ചി: ജാമ്യ വ്യവസ്ഥകള്‍ ലംഘിച്ച് അറസ്റ്റിലായ രാഹുല്‍ ഈശ്വര്‍ വീണ്ടും ജാമ്യം തേടി ഹൈക്കോടതിയില്‍. ശബരിമല യുവതി പ്രവേശനവുമായി ബന്ധപ്പെട്ട കേസില്‍ ജാമ്യവ്യവസ്ഥ ലംഘിച്ചതിന്റെ പേരില്‍ രാഹുല്‍ കഴിഞ്ഞദിവസം പാലക്കാട് വെച്ച് അറസ്റ്റിലായിരുന്നു.
പമ്പ പൊലീസ് രജിസ്റ്റര്‍ ചെയ്ത കേസില്‍ രണ്ടാഴ്ച കൂടുമ്പോള്‍ അന്വേഷണ ഉദ്യോഗസ്ഥനായ പമ്പ സര്‍ക്കിള്‍ ഇന്‍സ്‌പെക്ടറുടെ മുന്നില്‍ ഹാജരാകണമെന്ന വ്യവസ്ഥയില്‍ വീഴ്ച വരുത്തിയെന്നുകാട്ടി ജാമ്യം റദ്ദാക്കിയ നടപടി പിന്‍വലിക്കണമെന്നും ഹരജിയില്‍ ആവശ്യപ്പെട്ടിട്ടുണ്ട്.
ഡിസംബര്‍ എട്ടിന് പോലീസ് സ്‌റ്റേഷനില്‍ ഒപ്പിടേണ്ടതായിരുന്നെങ്കിലും ചെയ്തില്ലെന്നാണ് പോലീസിന്റെ ആരോപണം. ഇക്കാര്യം ചൂണ്ടിക്കാട്ടി നല്‍കിയ അപേക്ഷയെത്തുടര്‍ന്ന് ഗ്രാമ ന്യായാലയ കോടതിയാണ് ഡിസംബര്‍ 15ന് ജാമ്യം റദ്ദാക്കിയത്.
ജാമ്യവ്യവസ്ഥ ലംഘിച്ചതിനെ തുടര്‍ന്ന് തിരുവല്ല മജിസ്‌ട്രേറ്റ് കോടതിയാണ് രാഹുല്‍ ഈശ്വറിനെ 14 ദിവസത്തേക്ക് റിമാന്‍ഡ് ചെയ്തത്.
കഴിഞ്ഞദിവസം ഹിന്ദു മഹാസഭയുടെ പരിപാടിയില്‍ പങ്കെടുക്കാനെത്തിയ രാഹുല്‍ ഈശ്വറിനെ പാലക്കാട് നിന്നാണ് പോലീസ് അറസ്റ്റ് ചെയ്തത്.