മലപ്പുറം: എടക്കരയില്‍ വളര്‍ത്തുനായയോട് കണ്ണില്ലാ ക്രൂരത കാട്ടി ഉടമ. നായയെ ഇരുചക്രവാഹനത്തിന്റെ പുറകില്‍ കെട്ടിയിട്ട് വാഹനം ഓടിച്ചു.
വണ്ടിയ്ക്ക് ഒപ്പമെത്താന്‍ കിണഞ്ഞ് പരിശ്രമിക്കുന്ന നായയെ കണ്ട് നാട്ടുകാര്‍ ഇവര്‍ക്ക് പുറകെ പോയി. വാഹനം നിര്‍ത്താനുള്ള നാട്ടുകാരുടെ ആവശ്യത്തെ അവഗണിച്ച് ഉടമ വീണ്ടും സ്‌കൂട്ടറോടിച്ചു.
ശനിയാഴ്ച വൈകുന്നേരമാണ് സംഭവം. പെരുങ്കുളം മുതല്‍ മുസ്ല്യാരങ്ങാടി വരെ മൂന്ന് കിലോമീറ്ററോളം ദൂരമാണ് നായയെ കെട്ടിവലിച്ചത്. കൂടുതല്‍ നാട്ടുകാര്‍ സംഘടിച്ചതോടെ ഇയാള്‍ സ്‌കൂട്ടറില്‍ നിന്ന് നായയുടെ കെട്ടഴിച്ച് മാറ്റി. പിന്നീട് വാഹനവുമായി കടന്നുകളഞ്ഞു.
നായയെ ഉപേക്ഷിക്കാന്‍ കൊണ്ടുപോയതെന്നാണ് സൂചന. നായയ്ക്ക് പരിക്കേറ്റിട്ടുണ്ട്. ഔദ്യോഗികമായി പരാതി ലഭിച്ചിട്ടില്ലെങ്കിലും പോലീസ് അന്വേഷണം തുടങ്ങി.
നായ ശല്യമാണെന്നും ചെരിപ്പും വസ്ത്രങ്ങളും അടക്കമുള്ളവരെ കടിച്ചുമുറിക്കുകയാണെന്നും ഉടമ പറഞ്ഞതായി പ്രദേശവാസികള്‍ പറഞ്ഞു.
മുന്‍പ് എറണാകുളം അങ്കമാലിയിലും ഇതിന് സമാനമായ സംഭവം ഉണ്ടായിരുന്നു. കഴുത്തില്‍ കുരുക്ക് ഇട്ട ശേഷം ഓടുന്ന കാറില്‍ കെട്ടി വലിച്ചു കൊണ്ടു പോയാണ് അന്ന് നായയോട് ക്രൂരത കാട്ടിയത്. അതിനെതിരെ വ്യാപകമായി പ്രതിഷേധം ഉയര്‍ന്നിരുന്നു.
Discussion about this post