കോഴിക്കോട്: രാമനാട്ടുകരയില്‍ വന്‍ ലഹരിമരുന്ന് വേട്ട. രാമനാട്ടുകര ബസ് സ്റ്റാന്റ് പരിസരത്തുനിന്നാണ് കോടിരൂപയിലധികം വില വരുന്ന ഹാഷിഷ് ഓയില്‍ പോലീസ് കണ്ടെത്തിയത്. മൂന്ന് കോടി രൂപ വിലവരുമെന്നാണ് റിപ്പോര്‍ട്ട്.
സംഭവത്തില്‍ കോഴിക്കോട് പയ്യനാക്കല്‍ ചക്കുംകടവ് സ്വദേശി അന്‍വറിനെ എക്സൈസ് സംഘം കസ്റ്റഡിയിലെടുത്തു. ചൊവ്വാഴ്ച അര്‍ധരാത്രിയോടെയാണ് അന്‍വറിനെ പിടികൂടിയത്. ലഭിച്ച രഹസ്യ വിവരത്തിന്റെ അടിസ്ഥാനത്തിലായിരുന്നു നടപടി. വിജയവാഡയില്‍ നിന്നാണ് ലഹരിമരുന്ന് എത്തിച്ചതെന്നാണ് പ്രതി നല്‍കിയ മൊഴി. കോഴിക്കോട് നഗരത്തിലെ നിശാ പാര്‍ട്ടികള്‍ക്കും കോളേജ് വിദ്യാര്‍ഥികള്‍ക്കും വിതരണം ചെയ്യാനാണ് ഇത് എത്തിച്ചതെന്നും പ്രതി സംഘത്തോട് സമ്മതിച്ചു.
നിശാ പാര്‍ട്ടികള്‍ക്ക് പുറമേ, സിനിമ, കായിക രംഗത്തുള്ളവര്‍ക്കും അന്‍വര്‍ ലഹരിമരുന്ന് വിതരണം ചെയ്യുന്നുണ്ടെന്നാണ് എക്സൈസ് നല്‍കുന്ന വിവരം. വന്‍തോതില്‍ ഹാഷിഷ് ഓയില്‍ കടത്തിയതിന് പിന്നില്‍ മറ്റുപലര്‍ക്കും പങ്കുണ്ടെന്നാണ് സൂചന.
Discussion about this post