ജനിച്ചതും ഇപ്പോള്‍ ജീവിക്കുന്നതും ഇവിടെ! ഐഐഎം അസിസ്റ്റന്റ് പ്രൊഫസര്‍ രഞ്ജിത്ത് പാണത്തൂരിന്റെ വിജയകഥ

കാസര്‍ഗോഡ്: ജീവിത സാഹചര്യങ്ങളെ പഴിചാരി പഠനം നിര്‍ത്തുന്നവര്‍ ഏറെയാണ്, എന്നാല്‍ ഉള്ള സാഹചര്യങ്ങളില്‍ നിന്നും ഉന്നത വിജയം സ്വന്തമാക്കുന്നവരും കുറവല്ല. അത്തരത്തില്‍ മാതൃകയും പ്രചോദനവും പകരുകയാണ് റാഞ്ചി ഐഐഎമ്മിലെ അസിസ്റ്റന്റ് പ്രൊഫസറായ രഞ്ജിത്ത് ആര്‍ പാണത്തൂര്‍.

താന്‍ ജനിച്ചുവളര്‍ന്ന കുഞ്ഞുവീടിന്റെ ചിത്രം പങ്കുവച്ചാണ് രഞ്ജിത്ത് തന്റെ ജീവിത വിജയകഥ പങ്കുവയ്ക്കുന്നത്. തന്റെ കഥ ഒരാളുടെയെങ്കിലും സ്വപ്നങ്ങള്‍ക്ക് വളമാകുന്നെങ്കില്‍ അതാണ് തന്റെ വിജയമെന്നും രഞ്ജിത്ത് കുറിക്കുന്നു.

മേല്‍ക്കൂരയില്‍ കറുത്ത ഷീറ്റ് വലിച്ചു കെട്ടിയ, മണ്‍കട്ട ചുവരുള്ള ഒരു കുഞ്ഞുവീടിന്റെ ചിത്രം പങ്കുവച്ചാണ് രഞ്ജിത്ത് റാഞ്ചി ഐഐഎംലെ അസിസ്റ്റന്റ് പ്രൊഫസര്‍ പദവിയിലേക്ക് എത്തിയ ജീവിതം പറയുന്നത്. സോഷ്യല്‍ ലോകത്ത് ഈ വീട് വൈറലായിരിക്കുകയാണ്. ജനിച്ചതും വളര്‍ന്നതും ജീവിക്കുന്നതും ഈ വീട്ടിലാണെന്ന് പറഞ്ഞാണ് രജ്ഞിത്ത് കുറിപ്പ് ആരംഭിക്കുന്നത്.

ഫേസ്ബുക്കില്‍ പോസ്റ്റ് ചെയ്ത് മണിക്കൂറുകള്‍ക്കുള്ളില്‍ 1200 ഓളം പേരാണ് പോസ്റ്റ് ഷെയര്‍ ചെയ്തത്. സ്വന്തം ജീവിത സാഹചര്യങ്ങള്‍ മുന്നോട്ട് പോകാന്‍ തടസമാകുമ്പോള്‍ പഠനം നിര്‍ത്തേണ്ടി വരുന്നതിനെക്കുറിച്ച് ചിന്തിക്കേണ്ടി വരുന്ന നിരവധി പേര്‍ക്ക് പ്രചോദനമാകും ഈ പോസ്റ്റ്.

പഠനം നിര്‍ത്തേണ്ടി വന്ന സാഹചര്യമുണ്ടായിട്ടും തുടര്‍ന്നു പഠിക്കാന്‍ ഓരോ സമയങ്ങളിലായി വന്നു ചേര്‍ന്ന സാഹചര്യങ്ങളെക്കുറിച്ചും രഞ്ജിത്ത് തന്റെ പോസ്റ്റില്‍ പറയുന്നു.

രഞ്ജിത്ത് ആര്‍ പാണത്തൂരിന്റെ ഫേസ്ബുക്ക് പോസ്റ്റ്; ഈ വീട്ടിലാണ് ഞാൻ ജനിച്ചത്, ഇവിടെ ആണ് വളർന്നത്, ഇപ്പോൾ ഇവിടെ ആണ് ജീവിക്കുന്നത്…… ഒരുപ്പാട് സന്തോഷത്തോടെ പറയട്ടെ ഈ വീട്ടിൽ ഒരു IIM (Indian Institute of Management) Assistant Professor ജനിച്ചിരിക്കുന്നു……ഈ വീട് മുതൽ IIM Ranchi വരെയുള്ള എന്റെ കഥ പറയണമെന്ന് തോന്നി….. ഈ കഥ ഒരാളുടെയെങ്കിലും സ്വപ്നങ്ങൾക്ക് വളമാകുന്നെങ്കിൽ അതാണ് എന്റെ വിജയം….

ഹയർ സെക്കന്ററിക്ക് തരക്കേടില്ലാത്ത മാർക്കുണ്ടായിരുന്നു….. എന്നാലും എന്റെ ചുറ്റുപ്പാടിന്റെ സമർദ്ദം മൂലം പഠനം നിർത്താമെന്നു കരുതിയതാണ്…. എന്തോ ഭാഗ്യം കൊണ്ട് അതെ സമയം പാണത്തൂർ ടെലി‍ഫോൺ എക്സ്ചേഞ്ചിൽ രാത്രിക്കാല സെക്യൂരിറ്റി ആയി ജോലി കിട്ടി, പകൽ പഠിക്കാനുള്ള സമയവും. അടഞ്ഞെന്നു കരുതിയ വിദ്യാഭ്യാസം അവിടെ വീണ്ടും തുറക്കപ്പെട്ടു…. അത് ചെയ്യണം ഇത് ചെയ്യണം എന്നു അച്ഛനോ അമ്മയോ പറഞ്ഞു തന്നില്ല, പറഞ്ഞു തരാനും ആരുമുണ്ടായിരുന്നില്ല…… ഒഴുക്കിപ്പെട്ട അവസ്ഥ ആയിരുന്നു, പക്ഷെ നീന്തി ഞാൻ തൊട്ട കരകളൊക്കെ സുന്ദരമായിരുന്നു…. St. Pius College എന്നെ വേദികളിൽ സംസാരിക്കാൻ പഠിപ്പിച്ചു, Central University of Kerala കാസർകോടിന് പുറത്തൊരു ലോകമുണ്ടെന്നു പറഞ്ഞു തന്നു. അങ്ങനെയാണ് IIT Madras ന്റെ വല്ല്യ ലോകത്തു എത്തിയത്. പക്ഷെ അതൊരു വിചിത്ര ലോകമായിരുന്നു, ആദ്യമായിട്ട് ആൾക്കൂട്ടത്തിന് നടുക്ക് ഒറ്റയ്ക്കു ആയപോലെ തോന്നിപ്പോയി, ഇവിടെ പിടിച്ചു നിൽക്കാൻ ആകില്ലെന്നു മനസ് പലപ്പോഴും പറഞ്ഞിരുന്നു. മലയാളം മാത്രം സംസാരിച്ചു ശീലിച്ച എനിക്ക് സംസാരിക്കാൻ പോലും ഭയമായിരുന്നു….. ഇതെന്റെ വഴിയല്ല എന്നു തോന്നി PhD പാതിയിൽ ഉപേക്ഷിക്കാൻ തീരുമാനിച്ചു. പക്ഷെ എന്റെ guide (Dr. Subash) ആ തീരുമാനം തെറ്റാണു എന്നു എന്നെ ബോധ്യപെടുത്തി, തോറ്റു പിന്മാറും മുൻപ് ഒന്ന് പോരാടാൻ പറഞ്ഞു. തോറ്റു തുടങ്ങി എന്നു തോന്നിയ എനിക്ക് അന്ന് മുതൽ ജയിക്കണമെന്ന വാശി വന്നു. പാണത്തൂർ എന്ന മലയോര മേഖലയിൽ നിന്നുമാണ് എന്റെ യാത്രകളുടെ തുടക്കം…. വിത്തെറിഞ്ഞാൽ പൊന്നു വിളയുന്ന ആ മണ്ണിൽ വിദ്യ പാകിയാലും നൂറു മേനി കൊയ്യാനാകും എന്നു ഞാനും വിശ്വസിച്ചു തുടങ്ങി.

ഈ കുടിലിൽ (സ്വർഗത്തിൽ) നിന്നും IIM Ranchi യിലെ അസിസ്റ്റന്റ് പ്രൊഫസറിലേക്കുള്ള ദൂരം കഷ്ടപ്പാടിന്റെതായിരുന്നു, എന്റെ സ്വപ്നങ്ങളുടെ ആകെ തുകയായിരുന്നു, ഒരു അച്ഛന്റെയും അമ്മയുടെയും സഹനമായിരുന്നു.

എനിക്ക് നന്നായി അറിയാം ഇതുപോലെ ആയിരക്കണക്കിന് കുടിലുകളിൽ വിടരും മുൻപ് വാടി പോയ ഒരുപ്പാട് സ്വപ്നങ്ങളുടെ കഥ. ഇനി അവയ്ക്ക് പകരം സ്വപ്നസാക്ഷത്ക്കാരത്തിന്റെ കഥകൾ ഉണ്ടാകണം. ഒരുപക്ഷെ തലയ്ക്കു മുകളിൽ ഇടിഞ്ഞു വീഴാറായ ഉത്തരമുണ്ടായിരിക്കാം നാലു ചുറ്റിനും ഇടിഞ്ഞു വീഴാറായ ചുവരുകൾ ഉണ്ടായിരിക്കാം, പക്ഷെ ആകാശത്തോളം സ്വപ്നം കാണുക….. ഒരു നാൾ ആ സ്വപ്നങ്ങളുടെ ചിറകിലേറി നിങ്ങൾക്കും ആ വിജയതീരാത്തെത്താം…. ✊️✊️