മയ്യഴി: തെരഞ്ഞെടുപ്പ് റോഡ് ഷോയുടെ സമാപനത്തിനിടെ 10 വയസുകാരന് മിനി ലോറിക്കടിയില്‍പ്പെട്ട് മരിച്ചു. എന്‍ഡിഎ സ്ഥാനാര്‍ത്ഥി വിപി വിപി അബ്ദുള്‍ റഹ്മാന്റെ റോഡ് ഷോയ്ക്കിടെയാണ് ദാരുണമായ അപകടം നടന്നത്. മാഹി വളവില്‍ അയ്യപ്പക്ഷേത്രത്തിന് സമീപം കൃഷ്ണകൃപയില്‍ ആദിഷ് ലാല്‍ ആണ് മരിച്ചത്.
ഞായറാഴ്ച വൈകീട്ട് 6.15-ഓടെ കുട്ടിയുടെ വീടിനടുത്തു വെച്ചാണ് അപകടം നടന്നത്. അബ്ദുള്‍ റഹ്മാന്റെ റോഡ് ഷോയുടെ സമാപനം വളവില്‍ നടക്കുകയായിരുന്നു. ഇതിനിടെ സൈക്കിളില്‍ വന്ന ആദിഷ് പ്രചാരണ വാഹനത്തിനടിയിലേക്ക് വീഴുകയായിരുന്നു. മിനിലോറിയുടെ പിന്‍ചക്രം ദേഹത്തേയ്ക്ക് കയറുകയായിരുന്നു.
ഗുരുതരമായി പരിക്കേറ്റ കുട്ടിയെ മാഹി ആശുപത്രിയിലും തുടര്‍ന്ന് വടകരയിലെ സ്വകാര്യ ആശുപത്രിയിലും എത്തിച്ചെങ്കിലും ജീവന്‍ രക്ഷിക്കാനായില്ല. മാഹി പോലീസ് സ്‌പെഷ്യല്‍ ബ്രാഞ്ചിലെ ഹോം ഗാര്‍ഡ് വിശ്വലാലിന്റെയും ദൃശ്യയുടെയും മകനാണ്. ഗവ. എല്‍പി സ്‌കൂള്‍ അഞ്ചാംക്ലാസ് വിദ്യാര്‍ത്ഥിയാണ്. സഹോദരന്‍: അലന്‍ ലാല്‍.