പാലക്കാട്; എന്‍ഡിഎ സ്ഥാനാര്‍ത്ഥി പി നസീമയുടെ കാല്‍ തൊട്ട് വന്ദിച്ച് പ്രധാനമന്ത്രി നരേന്ദ്ര മോഡി. വീഡിയോ ഇതിനോടകം ബിജെപി നേതൃത്വം വൈറലാക്കി കഴിഞ്ഞു. പൊതുവേദിയില്‍വച്ചാണ് എന്‍ഡിഎ സ്ഥാനാര്‍ഥി പി. നസീമയെ മോഡി ആദരിച്ചത്.
തെരഞ്ഞെടുപ്പ് ആവേശം ഉയര്‍ത്തി നരേന്ദ്ര മോഡിയുടെ ആദ്യ പൊതുപരിപാടി ചൊവ്വാഴ്ച പാലക്കാട് കോട്ടമൈതാനത്തു നടന്നിരുന്നു. ഈ വേദിയിലാണ് മോഡിയുടെ കാല്‍ നസീമ തൊട്ട് വന്ദിച്ചത്. ഈ സമയം തന്നെ നസീമയുടെ കാല്‍ തൊട്ട് വന്ദിക്കുന്ന മോഡിയേയും വീഡിയോയില്‍ കാണാം. ഈ വീഡിയോ ഇപ്പോള്‍ ബിജെപി സൈബര്‍ ഗ്രൂപ്പുകളില്‍ വൈറലാവുകയാണ്.
എന്‍ഡിഎ മുന്നണിയില്‍ മത്സരിക്കുന്ന ഏക മുസ്ലിം വനിതയാണ് പി നസീമ. അണ്ണാഡിഎംകെ സ്ഥാനാര്‍ത്ഥിയായാണ് നസീമ മണ്ണാര്‍ക്കാടുനിന്ന് ജനവിധി തേടുന്നത്. അതേസമയം, വീഡിയോക്കെതിരെ സോഷ്യല്‍മീഡിയയില്‍ വിമര്‍ശനവും കടുക്കുന്നുണ്ട്. വെറും പ്രഹസനമെന്നാണ് സോഷ്യല്‍മീഡിയയുടെ വാദം.