മഞ്ചേശ്വരം: കാസര്‍കോട് മഞ്ചേശ്വരത്ത് പോലീസ് വാഹനത്തിന് നേരെ വെടിവെയ്പ്. വ്യാഴാഴ്ച രാത്രി 9.30ന് മിയാപദവ് ടൗണില്‍ വെച്ചാണ് സംഭവം നടന്നത്. സംഭവത്തില്‍ മൂന്ന് പേരെ അറസ്റ്റ് ചെയ്തു.
വ്യാഴാഴ്ച രാത്രിയില്‍ ഏഴംഗ സംഘം നാട്ടുകാര്‍ക്ക് നേരെ തോക്കുചൂണ്ടി ഭീഷണിപ്പെടുത്തിയെന്ന വിവരത്തെ തുടര്‍ന്ന് അന്വേഷിച്ച് എത്തിയ പോലീസ് വാഹനത്തിന് നേരെയാണ് വെടിവെപ്പുണ്ടായത്. പോലീസ് സംഘത്തെ കണ്ടപ്പോള്‍ പ്രതികള്‍ വാഹനം ഉപേക്ഷിച്ച് രക്ഷപ്പെട്ടു. പിന്‍തുടര്‍ന്ന് പോയേങ്കിലും പോലീസിന് പ്രതികളെ പിടിക്കാന്‍ കഴിഞ്ഞില്ല.
തുടര്‍ന്ന് പ്രതികള്‍ ഉപേക്ഷിച്ച് പോയ വാഹനം പോലീസ് കസ്റ്റഡിയിലെടുത്തു. ഇത് പോലീസ് സ്റ്റേഷനിലേക്ക് എത്തിക്കുന്നതിനിടെയാണ് വെടിവെപ്പുണ്ടായത്. വെടിവയ്പ്പില്‍ ആര്‍ക്കും ഗുരുതരമായ പരിക്കില്ല.
കേസുമായി ബന്ധപ്പെട്ട് മൂന്ന് പേരെ കര്‍ണാടക പോലീസ് അറസ്റ്റ് ചെയ്തു. കേസിലെ മറ്റുള്ളവര്‍ ഒളിവിലാണ്. ഇവര്‍ക്കായി പോലീസ് തിരച്ചില്‍ ഊര്‍ജിതമാക്കി.