ഗുവാഹത്തി: പതിനഞ്ച് വര്‍ഷത്തെ കോണ്‍ഗ്രസ് ഭരണം അസമില്‍ തീവ്രവാദ പ്രവര്‍ത്തനങ്ങള്‍ വര്‍ധിപ്പിച്ചുവെന്ന് കേന്ദ്ര ആഭ്യന്തരമന്ത്രി അമിത് ഷാ. കോണ്‍ഗ്രസ് ഭരണത്തില്‍ ജനങ്ങള്‍ സുരക്ഷിതരല്ലെന്നും കൃത്യമായ അന്വേഷണം നടക്കുന്നില്ലെന്നും അമിത് ഷാ പറഞ്ഞു. അസമിലെ മാജുലിയില്‍ നടന്ന തെരഞ്ഞെടുപ്പ് പരിപാടിക്കിടെയായിരുന്നു പരാമര്‍ശം.
‘ബിജെപി ഭരണത്തിന്‍ കീഴില്‍ തീവ്രവാദം ഇല്ലാതായി. അത്തരം പ്രവര്‍ത്തനങ്ങള്‍ നടത്തുന്നവരെ ഞങ്ങള്‍ അറസ്റ്റ് ചെയ്തു. അസമിലെ നുഴഞ്ഞുകയറ്റമില്ലാതാക്കാന്‍ ബിജെപിയ്ക്ക് മാത്രമെ കഴിയുകയുള്ളു’, അദ്ദേഹം പറഞ്ഞു.
അതേസമയം, അസമില്‍ കോണ്‍ഗ്രസ് പ്രചാരണം ശക്തമായ സാഹചര്യത്തിലാണ് അമിത് ഷായുടെ പരാമര്‍ശം. കഴിഞ്ഞ ദിവസം നടന്ന പൊതുറാലിക്കിടെ കോണ്‍ഗ്രസ് അധികാരത്തിലെത്തിയാല്‍ പൗരത്വനിയമം നടപ്പാക്കില്ലെന്ന് കോണ്‍ഗ്രസ് നേതാവ് രാഹുല്‍ ഗാന്ധി പ്രഖ്യാപിച്ചിരുന്നു.
ബിജെപിയാണ് സമൂഹത്തില്‍ ഭിന്നിപ്പുണ്ടാക്കുന്നതെന്നും എല്ലായിടത്തും വെറുപ്പ് പ്രചരിപ്പിക്കാനാണ് അവരുടെ ശ്രമങ്ങളെന്നും രാഹുല്‍ പറഞ്ഞു. എന്നാല്‍ കോണ്‍ഗ്രസ് ഉള്ളിടത്തോളം ബിജെപിയുടെ ഇത്തരം വിദ്വേഷ പ്രവര്‍ത്തനങ്ങള്‍ എന്ത് വിലകൊടുത്തും തടയുമെന്നും രാഹുല്‍ കൂട്ടിച്ചേര്‍ത്തു.
അസം ജനത വഞ്ചിക്കപ്പെട്ടുവെന്നും അഞ്ച് വര്‍ഷം മുമ്പ് 25 ലക്ഷം തൊഴില്‍ നല്‍കുമെന്ന് ഉറപ്പുനല്‍കിയ ബിജെപി പകരം നല്‍കിയത് സിഎഎ ആണെന്നും പ്രിയങ്ക പറഞ്ഞിരുന്നു.
