പത്തനംതിട്ട: ശബരിമലയിലെ സുരക്ഷയ്ക്കായുള്ള മൂന്നാംഘട്ട പോലീസ് സംഘം ഇന്ന് സേവനം ആരംഭിക്കും. ഐജി എസ് ശ്രീജിത്തിനാണ് സന്നിധാനത്തെയും പമ്പയിലെയും ചുമതല. നിലയ്ക്കല്, വടശേരിക്കര, എരുമേലി എന്നിവിടങ്ങളിലെ സുരക്ഷാ മേല്നോട്ടം ഇന്റലിജന്സ് ഡിഐജി എസ് സുരേന്ദ്രനാണ്. സന്നിധാനത്ത് കോഴിക്കോട് റൂറല് ഡിസിപി ജി ജയ്ദേവും ക്രൈംബ്രാഞ്ച് എസ്പി പിബി രാജീവുമാണ് ഉണ്ടാവുക. മൂന്നാം ഘട്ടത്തില് 4,026 പോലീസ് ഉദ്യോഗസ്ഥര് സേവനത്തിനുണ്ടാകും.
അതേസമയം ശബരിമല പ്രതിഷേധവുമായി ബന്ധപ്പെട്ട് പോലീസ് നേരത്തെ നടത്തിയ കൂട്ട അറസ്റ്റുകളില് അന്വേഷണം ആവശ്യപ്പെട്ട് ബിജെപി നേതാവ് ശോഭാ സുരേന്ദ്രന് കഴിഞ്ഞ ദിവസം കോടതിയെ സമീപിച്ചിരുന്നു. കേസുകളുടെ വിശദാംശങ്ങള് ആവശ്യപ്പെട്ടും, വീഴ്ച വരുത്തിയ പോലീസുകാര്ക്കെതിരെ നടപടി വേണമെന്നും ആവശ്യപ്പെട്ടുമായിരുന്നു ഇവര് പൊതുതാല്പര്യ ഹര്ജി നല്കിയത്. എന്നാല് ഈ ഹര്ജിയില് കോടതിയുടെ സമയം കളയുകയാണെന്ന് പറഞ്ഞ കോടതി ശോഭാ സുരേന്ദ്രനെതിരെ രൂക്ഷമായാണ് പ്രതികരിച്ചത്. മാത്രമല്ല കോടതിയുടെ സമയം നഷ്ടപ്പെടുത്തിയതിനാല് 25,000 രൂപ കോടതിയില് പിഴയായി കെട്ടിവെക്കാനും കോടതി ഉത്തരവിട്ടിരുന്നു.
Discussion about this post