തിരുവനന്തപുരം: എല്ലാ തെരഞ്ഞെടുപ്പിലും ഒരുപാട് തയ്യാറെടുപ്പുകള്‍ നടത്താറുണ്ട്. ഇത്തവണ കുറെ വിലയിരുത്തലുകള്‍ മുന്നില്‍ കണ്ടുകൊണ്ടാണ് തീരുമാനങ്ങള്‍ എടുത്തിട്ടുള്ളത്. ഈ തീരുമാനങ്ങള്‍ സത്യസന്ധമാണെങ്കില്‍ തീര്‍ച്ചയായും ബിജെപി വിജയത്തിലെത്തുമെന്ന് ബിജെപി എംപിയും നടനുമായി സുരേഷ് ഗോപി. തിരുവനന്തപുരം ശാസ്തമംഗലത്തെ വാര്‍ഡില്‍ ആദ്യ വോട്ടര്‍മാരില്‍ ഒരാളായി വോട്ട് ചെയ്ത ശേഷമാണ് താരത്തിന്റെ പ്രതികരണം.
ഉച്ചയ്ക്ക് മുമ്പായി എല്ലാവരും വോട്ട് രേഖപ്പെടുത്തണമെന്നും കുറെയധികം ജാരസംഘങ്ങള്‍ അനാവശ്യങ്ങള്‍ പരത്താന്‍ നടക്കുന്നുണ്ടെന്നും സുരേഷ് ഗോപി പറയുന്നു. വോട്ടര്‍മാരുടെ തീരുമാനം ഞങ്ങള്‍ക്ക് അനുകൂലമാണെങ്കില്‍ തിരുവനന്തപുരം കോര്‍പ്പറേഷന്‍ ബിജെപി പിടിച്ചടക്കുമെന്നും അദ്ദേഹം ആത്മവിശ്വാസം പ്രകടിപ്പിച്ചു.
തിരുവനന്തപുരം, കൊല്ലം, പത്തനംതിട്ട, ആലപ്പുഴ, ഇടുക്കി ജില്ലകളിലാണ് ഇന്ന് പോളിങ് നടക്കുന്നത്. വ്യാഴാഴ്ച നടക്കുന്ന രണ്ടാംഘട്ട തെരഞ്ഞെടുപ്പ് നടക്കുന്നത്, കോട്ടയം, എറണാകുളം, തൃശ്ശൂര്‍, പാലക്കാട്, വയനാട് തുടങ്ങിയ ജില്ലകളിലാണ്. വടക്കന്‍ കേരളത്തില്‍ ഡിസംബര്‍ 14നുമാണ് വോട്ടെടുപ്പ് നടക്കുന്നത്.
Discussion about this post