കണ്ണൂര്‍: പത്രിക സമര്‍പ്പിക്കാനുള്ള അവസാന ദിനം കഴിഞ്ഞതോടെ കണ്ണൂരില്‍ 15 ഇടങ്ങളില്‍ വിജയം ഉറപ്പിച്ച് എല്‍ഡിഎഫ്.കണ്ണൂരില്‍ 15 ഇടങ്ങളില്‍ എല്‍ഡിഎഫിന് എതിരില്ല. ആന്തൂര്‍ നഗരസഭയിലെ ആറു വാര്‍ഡുകളിലും മലപ്പട്ടം പഞ്ചായത്തിലെ 5 വാര്‍ഡുകളിലും, ഇതിനു പുറമെ തളിപ്പറമ്പ് നഗരസഭയിലെ ഒരു വാര്‍ഡിലും കാങ്കോല്‍ ആലപ്പടമ്പ് പഞ്ചായത്തിലെ രണ്ടു വാര്‍ഡുകളിലും കോട്ടയം മലബാര്‍ പഞ്ചായത്തിലെ ഒരു വാര്‍ഡും എല്‍ഡിഎഫിന് എതിരാളികള്‍ ഇല്ല.
ആന്തൂര്‍ നഗരസഭയിലെ രണ്ട്, മൂന്ന്, 10, 11, 16, 24 വാര്‍ഡുകളാണ് പത്രിക സമര്‍പ്പണം പൂര്‍ത്തിയാകുന്നതോടെ തന്നെ എല്‍ഡിഎഫ് സ്വന്തമാക്കിയത്. ഇവിടെ യുഡിഎഫിനും ബിജെപിക്കും ഒരാളെ സ്ഥാനാര്‍ഥിയായി കണ്ടെത്താനായില്ല. എല്‍ഡിഎഫ് സ്ഥാനാര്‍ത്ഥികളും ഡമ്മി സ്ഥാനാര്‍ത്ഥികളും മാത്രമാണ് ഈ വാര്‍ഡുകളില്‍ പത്രിക സമര്‍പ്പിച്ചത്. മലപ്പട്ടം പഞ്ചായത്തിലെ മൂന്ന്, അഞ്ച്, എട്ട്, ഒമ്പത്, 11 വാര്‍ഡുകളിലും എല്‍ഡിഎഫിന് എതിരില്ല.
തളിപ്പറമ്പ് നഗരസഭ 25ാം വാര്‍ഡായ കൂവോടില്‍ ഡി വനജ, കാങ്കോല്‍ ആലപ്പടമ്പ് പഞ്ചായത്തിലെ ഒമ്പതാം വാര്‍ഡില്‍ ഇസി സതി, പതിനൊന്നാംവാര്‍ഡില്‍ കെ പത്മിനി, കോട്ടയം പഞ്ചായത്തിലെ മൂന്നാംവാര്‍ഡില്‍ കെ ധനഞ്ജയന്‍ എന്നിവര്‍ക്കും എതിരുണ്ടായില്ല.
Discussion about this post