തിരുവനന്തപുരം: ശബരിമലയിലേക്ക് പോകാന്‍ ആന്ധ്രയില്‍ നിന്ന് എത്തിയ അയ്യപ്പ സംഘത്തിനൊപ്പം തിരുവനന്തപുരം റെയില്‍വേ സ്റ്റേഷനില്‍ കിടന്നുറങ്ങിയ ആറ് വയസ്സുകാരിയെ എടുത്ത് കൊണ്ട് ഓടിയ യുവാവിനെ പോലീസ് അറസ്റ്റ് ചെയ്തു.കുഴിതുറ കഴുകന്‍തിട്ട സ്വദേശി ശ്രീജിത്ത്(38) ആണ് പിടിയിലായത്.
ഇന്നലെ രാത്രി 12.30നായിരുന്നു സംഭവം. ആന്ധ്രയില്‍ നിന്നെത്തിയ അയ്യപ്പ സംഘത്തിനൊപ്പം പ്ലാറ്റ്‌ഫോമില്‍ ഉറങ്ങുകയായിരുന്ന കുട്ടിയെ ആണ് ശ്രീജിത്ത് എടുത്തുകൊണ്ട് റെയില്‍വേസ്റ്റേഷന് പുറത്തേക്ക് ഓടിയത്. കുട്ടിയുമായി ഓടിയ ശ്രീജിത്തിനെ ആര്‍എംഎസ്സിന് സമീപം വെച്ച് കെഎസ്ആര്‍ടിസി പ്രീപെയ്ഡ് ഓട്ടോ സ്റ്റാന്‍ഡിലെ ഡ്രൈവര്‍മാരും തമ്പാനൂര്‍ എസ് ഐ ശ്രീകുമാറിന്റെ നേതൃത്വത്തിലുള്ള പോലീസ് സംഘവും ചേര്‍ന്ന് പിടികൂടുകയായിരുന്നു.
പിടിയിലായ ശ്രീജിത്തിനെ റെയില്‍വേ പോലീസിന് കൈമാറി. കുട്ടിയെ ശ്രീജിത്ത് എടുത്തുകൊണ്ട് ഓടുന്ന ദൃശ്യങ്ങള്‍ റെയില്‍വേ സ്റ്റേഷനിലെ സിസിടിവി ക്യാമറയില്‍ പതിഞ്ഞിട്ടുണ്ട്. കുട്ടിയെ പോലീസ് ബന്ധുക്കളെ ഏല്‍പ്പിച്ചു.
Discussion about this post