കൊച്ചി: ട്രാന്‍സ് വുമണ്‍ സജ്ന ഷാജി ആത്മഹത്യക്ക് ശ്രമിച്ചു. അമിതമായ അളവില്‍ ഗുളിക കഴിച്ച സജ്നയെ കൊച്ചിയിലെ സ്വകാര്യ ആശുപത്രിയില്‍ പ്രവേശിപ്പിച്ചിരിക്കുകയാണ്. ഐസിയുവില്‍ നിരീക്ഷണത്തിലാണ് സജ്നയിപ്പോള്‍. അതേസമയം ഇവരുടെ നില ഗുരുതമല്ലെന്നാണ് ആശുപത്രി അധികൃതര്‍ വ്യക്തമാക്കിയത്. ഒരു പ്രമുഖ മാധ്യമമാണ് ഈ വാര്‍ത്ത റിപ്പോര്‍ട്ട് ചെയ്തിരിക്കുന്നത്.
കുറച്ചു ദിവസങ്ങള്‍ക്ക് മുമ്പാണ് ബിരിയാണി വില്‍പ്പനക്കിടെ ഇവര്‍ക്ക് നേരെ ആക്രമണം ഉണ്ടായത്. ഇത് വലിയ വാര്‍ത്തയായിരുന്നു സിനിമാ താരങ്ങള്‍ അടക്കം നിരവധി പ്രമുഖര്‍ സജ്‌നയ്ക്ക് സഹായവുമായി രംഗത്ത് എത്തിയിരുന്നു. എന്നാല്‍ ഇത് ഇവരുടെ തട്ടിപ്പ് ആണെന്നാണ് മറ്റൊരു ട്രാന്‍സ് വുമണ്‍ ആരോപണം ഉന്നയിച്ചു സാമൂഹിക മാധ്യമങ്ങളില്‍ എത്തിയിരുന്നു. ഒപ്പമുള്ള ആളിനോട് സജ്ന സംസാരിക്കുന്ന ശബ്ദസന്ദേശവും ഇവര്‍ പുറത്തുവിട്ടിരുന്നു. ഇതേ തുടര്‍ന്നാണ് സജ്ന ആത്മഹത്യക്ക് ശ്രമിച്ചത്.
വഴിയരികില്‍ ബിരിയാണി വിറ്റിരുന്ന തന്റെ കച്ചവടം തടസപ്പെടുത്താന്‍ ചിലര്‍ ശ്രമിച്ചക്കുന്നതായി സജ്ന തന്നെ സോഷ്യല്‍ മീഡിയയിലൂടെ അറിയിച്ചിരുന്നു. തുടര്‍ന്ന് യൂത്ത് കോണ്‍ഗ്രസ് അടക്കമുള്ള സംഘടനകളും ആരോഗ്യമന്ത്രിയടക്കമുള്ള പ്രമുഖരും സജ്‌നയ്ക്ക് പിന്തുണയുമായി എത്തിയിരുന്നു. പിന്തുണ ഏറിയതോടെ സജ്‌നയുടെ കച്ചവടം നല്ലനിലയില്‍ ഉയരുകയും ചെയ്തിരുന്നു. വഴിയരികിലെ ബിരിയാണി വില്‍പ്പനയില്‍ നിന്ന് ഹോട്ടല്‍ തുടങ്ങാനുള്ള ശ്രമത്തിലായിരുന്നു സജ്ന. ഇതിനിടെയാണ് സജ്‌നയ്‌ക്കെതിരെ ആരോപണവുമായി മറ്റൊരു ട്രാന്‍സ് വുമണ്‍ രംഗത്ത് എത്തിയത്.