തിരുവനന്തപുരം: യൂത്ത് കോണ്ഗ്രസ് തിരുവനന്തപുരം ജില്ലാ സെക്രട്ടറി ബിജെപിയില്‍ ചേര്‍ന്നു. മുദാക്കല്‍ ഇളമ്പ പാലം സ്വദേശിയും യൂത്ത് കോണ്ഗ്രസ് മണ്ഡലം മുന്‍ പ്രസിഡന്റുമായ മിഥുന്‍ പള്ളിയറയാണ് ബിജെപിയിലേക്ക് ചേക്കേറിയത്.
മാരാര്‍ജി ഭവനില്‍ വച്ച് ബിജെപി ജില്ലാപ്രസിഡന്റ് വി.വി രാജേഷ് കാവി ഷാള്‍ അണിയിച്ചാണ് മിഥുനെ ബിജെപിയിലേക്ക് സ്വീകരിച്ചത്. വിവി രാജേഷ് തന്നെയാണ് ഈ ദൃശ്യങ്ങള്‍ ഫേസ്ബുക്കില്‍ പങ്കുവെച്ചത്.
യൂത്ത് കോണ്ഗ്രസ് സംഘടനാ തെരഞ്ഞെടുപ്പ് നടന്ന് വൈകാതെയാണ് ജില്ലാ സെക്രട്ടറി ബിജെപിയിലേക്കു പോകുന്നത്. തദ്ദേശ തെരഞ്ഞെടുപ്പ് അടുത്തതോടെ നിരവധി കോണ്ഗ്രസ് -യൂത്ത് കോണ്ഗ്രസ് പ്രവര്‍ത്തകരാണ് ബിജെപിയിലേക്ക് ചേക്കേറുന്നത്. അതേസമയം സ്ത്രീവിഷയവുമായി ബന്ധപ്പെട്ട് പരാതി ലഭിച്ചതിനെ തുടര്‍ന്ന് ഇയാളെ ഇന്നലെ സസ്‌പെന്‍ഡ് ചെയ്തിരുന്നതായി യൂത്ത് കോണ്ഗ്രസ് നേതൃത്വം പറയുന്നു.
