മലപ്പുറം: ഭര്തൃവീട്ടില് യുവതിയെ മരിച്ച നിലയില് കണ്ടെത്തിയ സംഭവത്തില് വിശദമായ അന്വേഷണം ആവശ്യപ്പെട്ട് യുവതിയുടെ ബന്ധുക്കള് രംഗത്ത്. മലപ്പുറം പാവണ്ണ സ്വദേശി ഷമീമയെയാണ് മരിച്ച നിലയില് കണ്ടെത്തിയത്. യുവതിയുടെ മരണത്തില് ദുരൂഹതയുണ്ടെന്ന് ബന്ധുക്കള് ആരോപിക്കുന്നു.
തിങ്കളാഴ്ച ആയിരുന്നു സംഭവം. ഷമീമയുടെ വീട്ടിലായിരുന്ന കുട്ടിയെ തിരികെ എത്തിക്കാന് ചെന്ന സഹോദരന് മുസ്തഫയാണ് കിടപ്പുമുറിയില് യുവതിയെ മരിച്ച നിലയില് കണ്ടത്. ഉടന് തന്നെ ഷമീമയെ എടവണ്ണയിലെ സ്വകാര്യ ആശുപത്രിയിലും പിന്നീട് മഞ്ചേരി മെഡിക്കല് കോളജ് ആശുപത്രിയിലും എത്തിച്ചു.എന്നാല് രക്ഷിക്കാന് സാധിച്ചില്ല.
ഷമീമയുടെ ചെറിയ കുട്ടി റൂമില് നിന്ന് കരയുന്നത് ശ്രദ്ധയില് പെട്ടിട്ടും ഭര്തൃവീട്ടുകാര് തിരിഞ്ഞ് നോക്കിയില്ലെന്നും ഇത് മരണത്തില് ഏറെ ദുരൂഹത ഉണ്ടെന്നുമാണ് ബന്ധുക്കള് ആരോപിക്കുന്നത്. യുവതിയുടെ മരണത്തില് വിശദമായ അന്വേഷണം ആവശ്യപ്പെട്ട് ബന്ധുക്കള് അരീക്കോട് പോലീസില് പരാതി നല്കി.
ഷമീമയ്ക്ക് ഗാര്ഹിക പീഡനം അനുഭവിക്കേണ്ടി വന്നിട്ടുണ്ടെന്ന് സംശയിക്കുന്നതായി ബന്ധുക്കള് ആരോപിക്കുന്നു.ഭര്തൃ കുടുംബത്തെ കുറിച്ച് നേരത്തെ ഷമീമ പരാതി പറഞ്ഞിരുന്നു എന്നും ബന്ധുക്കള് പറഞ്ഞു.ഊര്ങ്ങാട്ടിരി പാവണ്ണ കല്ലിങ്ങല് ഷൗക്കത്തലിയുടെ മകള് ഷമീമയെ ഏഴുവര്ഷം മുന്പാണ് കാവനൂര് വി കെ പടിയിലേക്ക് വിവാഹം കഴിച്ച് അയച്ചത്.ആറും മൂന്നും വയസ്സുള്ള രണ്ടു കുട്ടികളുമുണ്ട്.
Discussion about this post