കൊച്ചി: സ്വര്‍ണ്ണക്കടത്ത് കേസില്‍ ബിജെപിയെ പരിഹസിച്ച് മന്ത്രി കടകംപള്ളി സുരേന്ദ്രന്‍. സ്വര്‍ണ്ണക്കടത്ത് കേസില്‍ അന്വേഷണം ശരിയായ ദിശയിലാണെന്നും അദ്ദേഹം പറയുന്നു. ജനം ടിവിയിലെ മാധ്യമപ്രവര്‍ത്തകനെ തള്ളിപ്പറഞ്ഞതിന്റെയും ചാനലിനെ തന്നെ തള്ളിപ്പറഞ്ഞതിന്റെയും അടിസ്ഥാനത്തിലാണ് മന്ത്രിയുടെ പരിഹാസം. പെറ്റമ്മയെ എന്ന് തള്ളിപ്പറയും എന്ന് മാത്രം അന്വേഷിച്ചാല്‍ മതിയെന്ന് മന്ത്രി പരിഹസിച്ചു.
മന്ത്രിയുടെ വാക്കുകള്‍ ഇങ്ങനെ;
സ്വര്‍ണക്കടത്ത് കേസില്‍ അന്വേഷണം ശരിയാ ദിശയിലാണ്. ബിജെപി, യുഡിഎഫ് ബന്ധമുള്ളവരാണ് സ്വര്‍ണക്കടത്ത് കേസില്‍ അകപ്പെട്ടത്. ജനം ടിവിയെയും അനില്‍ നമ്പ്യാരേയും തള്ളിപ്പറഞ്ഞതിലൂടെ കേന്ദ്രമന്ത്രി വി മുരളീധരനെയും സംസ്ഥാന ബിജെപി നേതൃത്വം തള്ളിക്കളഞ്ഞിരിക്കുകയാണ്.
ജനം ടിവിയിലെ മാധ്യമപ്രവര്‍ത്തകനെ തള്ളിപ്പറഞ്ഞത് വേണമെങ്കില്‍ നമുക്ക് മനസിലാക്കാം. എന്നാല്‍ ആ ചാനലിനെ തന്നെ ബിജെപി നേതൃത്വം തള്ളിപ്പറഞ്ഞതോടുകൂടി കേന്ദ്ര സഹമന്ത്രിയേക്കൂടി സംസ്ഥാന നേതൃത്വം തള്ളിപ്പറഞ്ഞിരിക്കുകയാണ്. ഇതോടെ ബിജെപി എന്താണെന്ന് രാജ്യത്തെ ജനങ്ങള്‍ക്ക് ബോധ്യമായിട്ടുണ്ട്. പെറ്റമ്മയെ എന്ന് തള്ളിപ്പറയും എന്ന കാര്യം മാത്രം നമ്മളിനി അന്വേഷിച്ചാല്‍ മതി.