തിരുവനന്തപുരം: കേരളത്തിന് വീണ്ടുമൊരു പൊന്‍തൂവല്‍. ഇത്തവണ കേരളത്തിന് അഭിനന്ദിച്ചും വാഴ്ത്തിയും വാര്‍ത്ത പങ്കുവെച്ചും രംഗത്തെത്തിയിരിക്കുന്നത് ബ്രിട്ടണ്‍ ആണ്. മോണിംഗ് സ്റ്റാര്‍ ദിനപത്രത്തിലാണ് കേരളത്തെയും സംസ്ഥാന വ്യാപകമായി ഡിവൈഎഫ്‌ഐ നടത്തിയ റീ സൈക്കിള്‍ കേരള ക്യാംപെയിനിനെയും അഭിനന്ദിച്ച് വാര്‍ത്ത പങ്കുവെച്ചിരിക്കുന്നത്.
കേരളത്തിലെ യുവ കമ്മ്യൂണിസ്റ്റുകള്‍ വ്യത്യസ്തമായ ക്യാംപെയിനിലൂടെ 1.2 ദശലക്ഷം പൗണ്ട് ശേഖരിച്ചു എന്ന തലക്കെട്ടിലാണ് ലേഖനം പുറത്തിറക്കിയത്. ലേഖനത്തില്‍ റീസൈക്കിള്‍ കേരളയെ കുറിച്ച് വിശദമായി തന്നെ പരാമര്‍ശിക്കുന്നുണ്ട്. ന്യൂസ് പേപ്പറുകളും കുപ്പികളുമടക്കം ശേഖരിച്ച് പണം കണ്ടെത്തി ദുരിതാശ്വാസ നിധിയിലേക്ക് ഡിവൈഫ്ഐ നല്‍കിയ സംഭാവനയെ പത്രം മാതൃകാപരമായ പ്രവര്‍ത്തനമായി എന്ന് കുറിക്കുന്നുണ്ട്. ഫുട്ബോള്‍ താരം സികെ വിനീത് തന്റെ ജഴ്സി ലേലത്തിന് വച്ചതും മാധ്യമം ലേഖനത്തില്‍ പരാമര്‍ശിക്കുന്നുണ്ട്.
അതേസമയം, മോണിംഗ് സ്റ്റാര്‍ ലേഖനം കമ്മ്യൂണിസ്റ്റ് പാര്‍ട്ടി ഓഫ് ബ്രിട്ടന്‍ ഔദ്യോഗിക ട്വിറ്റര്‍ അക്കൗണ്ടിലൂടെ ട്വീറ്റ് ചെയ്തിട്ടുമുണ്ട്. ക്ഷേമ പെന്‍ഷന്‍, വീടില്ലാത്തവര്‍ക്ക് വീട്, ഹരിത കേരളം പദ്ധതി എന്നിവയെല്ലാം വാര്‍ത്തയില്‍ പറയുന്നത് കേരളത്തിന്റെ മികവ് കൂടുതല്‍ എടുത്ത് കാണിക്കുന്നുണ്ട്. ലോക്ഡൗണ്‍ സമയത്ത് കുട്ടികള്‍ക്ക് വീട്ടില്‍ ഭക്ഷണമെത്തിച്ചതടക്കമുള്ള കൊവിഡ് കാലത്തെ സംസ്ഥാന സര്‍ക്കാര്‍ നടപടികളെയാകെയും ദിനപത്രം പ്രശംസിക്കുന്നുണ്ട്.
Discussion about this post