തിരുവനന്തപുരം; സംസ്ഥാനത്ത് ഓണക്കിറ്റ് വിതരണം തുടരുന്നു. ഇന്നുമുതല്‍ പിങ്ക് റേഷന്‍ കാര്‍ഡുകാര്‍ക്കുള്ള ഓണക്കിറ്റ് വിതരണം ആരംഭിക്കും. ജൂലൈ മാസത്തില്‍ റേഷന്‍ സാധനങ്ങള്‍ വാങ്ങിയ കടകളില്‍നിന്ന് കാര്‍ഡ് ഉടമകള്‍ക്ക് ഓണക്കിറ്റും ലഭിക്കും.
റേഷന്‍ കാര്‍ഡ് നമ്പര്‍ പൂജ്യത്തില്‍ അവസാനിക്കുന്നവര്‍ക്കാണ് ഇന്ന് കിറ്റ് ലഭിക്കുക. ഒന്ന്, രണ്ട് അക്കങ്ങളില്‍ അവസാനിക്കുന്ന റേഷന്‍ കാര്‍ഡുകള്‍ക്ക് നാളെ കിറ്റ് ലഭിക്കും. 22ന് മൂന്ന്, നാല്, അഞ്ച് അക്കങ്ങളില്‍ അവസാനിക്കുന്ന കാര്‍ഡുകള്‍ക്കും കിറ്റ് ലഭിക്കും.
24ന് ആറ്, ഏഴ്, എട്ട്, ഒന്‍പത് അക്കങ്ങളില്‍ അവസാനിക്കുന്ന കാര്‍ഡുകള്‍ക്കും കിറ്റ് ലഭിക്കുമെന്ന് ഭക്ഷ്യ-പൊതു വിതരണ സെക്രട്ടറി അറിയിച്ചു. പിങ്ക് കാര്‍ഡ് ഉടമകള്‍ക്കുള്ള കിറ്റ് വിതരണം ചെയ്ത ശേഷം നീല , വെള്ള കാര്‍ഡ് ഉടമകള്‍ക്കുള്ള ഓണക്കിറ്റ് വിതരണം ചെയ്യും.
ആദ്യഘട്ടത്തില്‍ മഞ്ഞ കാര്‍ഡ് ഉടമകള്‍ക്കാണ് ഓണക്കിറ്റ് നല്‍കിയത്. 500 രൂപ വില വരുന്ന 11 ഇനം സാധനങ്ങളാണു കിറ്റില്‍. റേഷന്‍ കാര്‍ഡുള്ള എല്ലാ കുടുംബങ്ങള്‍ക്കും കിറ്റ് ലഭിക്കും.