തിരുവനന്തപുരം: സംസ്ഥാനത്ത് കൊവിഡ് വ്യാപനം ശക്തമായ പശ്ചാത്തലത്തില്‍ ഓണാഘോഷം വീടുകളില്‍ പരിമിതപ്പെടുത്തണമെന്ന് മുഖ്യമന്ത്രിയുടെ നിര്‍ദേശം. ജില്ലാ കളക്ടര്‍മാരുമായി നടത്തിയ വീഡിയോ കോണ്‍ഫന്‍സിലാണ് മുഖ്യമന്ത്രി ഓണക്കാല നിര്‍ദ്ദേശങ്ങള്‍ നല്‍കിയത്.
പൊതുസ്ഥലത്ത് ഓണാഘോഷം പാടില്ല. കര്‍ശന നിയന്ത്രണങ്ങള്‍ തുടരണം. പൂക്കളം ഇടുന്നതിന് പുറത്ത് നിന്നുള്ള പൂക്കള്‍ ഉപയോഗിക്കരുത്. പൂക്കളം ഒരുക്കാന്‍ അതത് പ്രദേശങ്ങളിലെ പൂക്കള്‍ ഉപയോഗിക്കണം. പുറത്ത് നിന്ന് വരുന്ന പൂക്കള്‍ രോഗവ്യാപന സാധ്യത കൂട്ടും. പൊതുസ്ഥലങ്ങളില്‍ ഓണാഘോഷവും ഓണസദ്യയും പാടില്ലെന്നും മുഖ്യമന്ത്രി പറഞ്ഞു.
ഓണക്കാലത്ത് തിരക്ക് ഒഴിവാക്കാനായി പോലീസ് ഇടപെടണം എന്നും മുഖ്യമന്ത്രി നിര്‍ദേശിച്ചു. കടകളുടെ പ്രവര്‍ത്തന സമയം രാവിലെ ഏഴ് മുതല്‍ രാത്രി ഏഴ് വരെയായിരിക്കും. ഹോട്ടലുകള്‍ രാത്രി ഒന്‍പത് മണിവരെ തുറക്കാം. ശാരീരിക അകലം ഉറപ്പാക്കണം.രോവ്യാപനം രൂക്ഷമാക്കാന്‍ ശ്രമമുണ്ടെന്നും അത്തക്കാരുടെ മുന്നില്‍ നിസ്സഹായരാകരുതെന്നും യോഗത്തില്‍ മുഖ്യമന്ത്രി നിര്‍ദ്ദേശം നല്‍കി. ജില്ലാ കളക്ടര്‍മാര്‍ വ്യാപാരി വ്യവസായികളുടെ യോഗം വിളിക്കണം. സംസ്ഥാനത്തേക്ക് എത്തുന്നവര്‍ക്ക് കൊവിഡ് പരിശോധന നടത്തുമെന്നും മുഖ്യമന്ത്രി പറഞ്ഞു.
Discussion about this post