കോഴിക്കോട്: ജ്യൂസ് കൊണ്ടുവന്നത് നമ്മുടെ ശത്രുക്കളായ ജുതന്മാരാണെന്നും അതുകൊണ്ട് ജ്യൂസ് കുടിക്കരുതെന്നും ആഹ്വാനം ചെയ്ത് മതപ്രഭാഷകന്‍ റഹ്മത്തുള്ള ഖാസിമി മുത്തേടത്ത്. ജ്യൂസ് ശരീരത്തിന് ഹാനികരമാണെന്നും കഴിക്കാന്‍ പാടില്ലെന്നും പറയുന്ന റഹ്മത്തുള്ള ഖാസിമിയുടെ വീഡിയോ ഇപ്പോള്‍ സോഷ്യല്‍മീഡിയയില്‍ ചര്‍ച്ചയായിക്കൊണ്ടിക്കുകയാണ്.
മുക്കം ഖുറാന്‍ സ്റ്റഡി സെന്ററിന്റെ വീഡിയോ ആണ് ഇപ്പോള്‍ സമൂഹമാധ്യമങ്ങളിലൂടെ പ്രചരിക്കുന്നത്. പള്ളിപ്പടി ഓഡിറ്റോറിയം എടക്കരയില്‍ വെച്ച് നടന്ന പ്രസംഗത്തിനിടയിലെ ഒരു മിനിറ്റ് ദൈര്‍ഘ്യമുളള ഭാഗമാണിത്. ഇകെ സുന്നി വിഭാഗം നേതാവും കൂടിയാണ് പ്രഭാഷകന്‍ റഹ്മത്തുള്ള ഖാസിമി.
‘ജ്യൂസ് ശരീരത്തിന് ഹാനികരമാണ്. എന്തുകൊണ്ടെന്നാല്‍ പഴം യാതൊരു കാരണവശാലും വെള്ളത്തോട് യോജിക്കൂല. മാത്രമല്ല ‘ജ്യൂസ്’ എന്നൊരു വര്‍ഗമില്ലേ, അവര്‍ നമ്മുടെ ശത്രുക്കളല്ലേ, ജ്യൂസ് കൊണ്ടുവന്നത് ജൂതന്മാരാണ്. ജ്യൂസ് ലോകത്ത് പണ്ട് ഉണ്ടായിരുന്നില്ല. മിഡില്‍ ഈസ്റ്റില്‍ ജ്യൂസ് കൊണ്ടുവന്നത് ‘ജ്യൂസ്’ ആണ്. അതുകൊണ്ട് ജ്യൂസ് കഴിക്കാനേ പാടില്ല.’ എന്നാണ് റഹ്മത്തുള്ള ഖാസിമി വീഡിയോയില്‍ പറയുന്നത്.
സോഷ്യല്‍മീഡിയയില്‍ വ്യാപകമായി പ്രചരിച്ച വീഡിയോയ്‌ക്കെതിരെ വിമര്‍ശനവുമായി നിരവധി പേരാണ് ഇതിനോടകം രംഗത്തെത്തിയത്. ട്രോളന്മാരും സംഭവം ഏറ്റെടുത്തിട്ടുണ്ട്.
Discussion about this post