ഹൈദരാബാദ്: മുംബൈ സന്ദര്‍ശനത്തിന് പണമുണ്ടാക്കാന്‍ രണ്ട് മാസം പ്രായമുള്ള ആണ്‍കുഞ്ഞിനെ വില്‍ക്കാന്‍ ശ്രമിച്ച കുഞ്ഞിന്റെ അമ്മയെ പോലീസ് അറസ്റ്റ് ചെയ്തു. ഇരുപത്തിരണ്ടുകാരിയായ ശെയ്ഖ് സോയാ ഖാനെ ആണ് അറസ്റ്റ് ചെയ്തത്. ഹൈദരാബാദിന് സമീപത്തുള്ള ഹബീബീനഗര്‍ പോലീസ് സ്റ്റേഷന്‍ പരിധിയിലാണ് സംഭവം റിപ്പോര്‍ട്ട് ചെയ്തിട്ടുള്ളത്.
45,000 രൂപയ്ക്കാണ് സ്വന്തം കുഞ്ഞിനെ യുവതി വില്‍ക്കാന്‍ തുനിഞ്ഞത്. കുഞ്ഞിനെ വില്‍ക്കാന്‍ ശ്രമിക്കുന്നതായി വിവരം ലഭിച്ചതിനെ തുടര്‍ന്ന് കുട്ടിയുടെ പിതാവ് അബ്ദുള്‍ മുജാഹീദ് പരാതിയുമായി ചൊവ്വാഴ്ച പോലീസിനെ സമീപിച്ചു. തുടര്‍ന്ന് നടത്തിയ അന്വേഷണത്തിലാണ് യുവതിയെ പോലീസ് അറസ്റ്റ് ചെയ്തത്.
യുവതിയെ കൂടാതെ കുട്ടിയെ വാങ്ങിയ കുടുംബവും വില്‍പനയിലെ ഇടനിലക്കാരനും അറസ്റ്റിലായി. യുവതിയെ കൂടാതെ അഞ്ച് പേരാണ് അറസ്റ്റിലായത്. ഭര്‍ത്താവുമായി പിണങ്ങി ഒറ്റയ്ക്ക് താമസിച്ചു വരികയായിരുന്നു യുവതി. കുഞ്ഞിനെ ഒറ്റയ്ക്ക് വളര്‍ത്തുന്ന ബുദ്ധിമുട്ട് യുവതിയെ അലട്ടിയിരുന്നു. കൂടാതെ മുംബൈ നഗരത്തിലേക്ക് പോകണമെന്ന് ഇവര്‍ ദീര്‍ഘകാലമായി ആഗ്രഹിച്ചിരുന്നു. തുടര്‍ന്നാണ് കുഞ്ഞിനെ വില്‍ക്കാന്‍ തീരുമാനിച്ചതെന്ന് യുവതി മൊഴി നല്‍കിയതായി പോലീസ് അറിയിച്ചു. ശിശുസംരക്ഷണ നിയമമനുസരിച്ച് പ്രതികള്‍ക്കെതിരെ കേസ് രജിസ്റ്റര്‍ ചെയ്തു. കുഞ്ഞിനെ പോലീസ് പിന്നീട് അച്ഛന് കൈമാറി.