ഇടുക്കി: റബര്‍ കര്‍ഷകരുടെ വോട്ടു വാങ്ങി ജയിച്ച ശേഷം അവരെ നിയമസഭയില്‍ അപമാനിക്കുകയും പരിഹസിക്കുകയും ചെയ്ത പിസി ജോര്‍ജിന്റെ മനോനില പരിശോധിക്കണമെന്ന് കേരള കോണ്‍ഗ്രസ് എം ജനറല്‍ സെക്രട്ടറി സ്റ്റീഫന്‍ ജോര്‍ജ്.
പിസി ജോര്‍ജിനെ വിദഗ്ധനായ മന:ശാസ്ത്രജ്ഞനെ കൊണ്ട് പരിശോധിപ്പിച്ച് ആവശ്യമായ മുന്‍കരുതല്‍ നടപടികള്‍ സ്വീകരിക്കാന്‍ അദ്ദേഹത്തിന്റെ അഭ്യുദയകാംക്ഷികള്‍ തയാറാകണമെന്നും അദ്ദേഹം പരിഹസിച്ചു.
അടുത്ത കാലത്തായി പിസി ജോര്‍ജിന്റെ പ്രസ്താവനകളും പ്രവൃത്തികളും ശ്രദ്ധിക്കുന്നവര്‍ക്ക് അദ്ദേഹത്തിന് എന്തോ സംഭവിച്ചിരിക്കുന്നതായി മനസിലാക്കാം. അങ്ങാടിയില്‍ തോറ്റതിന് അമ്മയോടെന്ന മട്ടിലാണ് അദ്ദേഹം പെരുമാറുന്നത്. റബര്‍ കര്‍ഷകര്‍ക്ക് സര്‍ക്കാര്‍ ഖജനാവില്‍ നിന്നും ഒരു അരിമണി പോലും നല്‍കരുതെന്നാണ് അദ്ദേഹം നിയമസഭയില്‍ ആവശ്യപ്പെട്ടത്.
സംസ്ഥാനത്തെ ലക്ഷകണക്കിന് റബര്‍ കര്‍ഷകര്‍ ജോര്‍ജിന് മാപ്പു നല്‍കില്ല. കടക്കെണിയിലായ കര്‍ഷകന്റെ കരണത്തടിക്കുകയാണ് ജോര്‍ജ് ചെയ്തത്. അദ്ദേഹത്തെ പിടിച്ചുകെട്ടിയില്ലെങ്കില്‍ സംസ്ഥാനത്ത് കൂടുതല്‍ ദുരന്തങ്ങള്‍ സംഭവിക്കുമെന്നും സ്റ്റീഫന്‍ ജോര്‍ജ് പറഞ്ഞു