കോട്ടയം: ഈ കോവിഡ് കാലത്ത് സ്വന്തം ജീവന് പോലും മറന്ന് മറ്റുള്ളവരുടെ ജീവനുവേണ്ടി പ്രവര്ത്തിക്കുന്നവര് നിരവധിയാണ്. ആരോഗ്യപ്രവര്ത്തകരെപ്പോലെ തന്നെ അതില് ഉള്പ്പെടുന്നവരാണ് ആംബുലന്സ് ഡ്രൈവര്മാരും. കോവിഡ് രോഗികളെ ആശുപത്രിയിലെത്തിക്കാനും മറ്റും രാപകലില്ലാതെ ഇവര് ആംബുലന്സുമായി കുതിക്കുന്നു.
കോവിഡിന്റെ ഔദ്യോഗിക വാഹനമായ ആംബുലന്സുകള് സേവനത്തിന്റെ അടയാളങ്ങളും കൂടിയാണ്. ഈ കോവിഡ് കാലത്ത് ജനങ്ങളില് നിന്നും തങ്ങള് നേരിടേണ്ടി വന്ന അനുഭവങ്ങള് തുറന്നു പറയുകയാണ് കോട്ടയം ജില്ലയിലെ ആംബുലന്സ് ഡ്രൈവര്മാരായ വി.ഒ. മണിക്കുട്ടനും രമേഷ് ഗോപിയും.
മണിക്കൂറുകളോളമാണ് പിപിഇ കിറ്റിനുള്ളില് വേവുന്ന ചൂടില് ജോലി ചെയ്യേണ്ടിവരുന്നത്, എന്നാല് അതിനേക്കാള് ബുദ്ധിമുട്ട് തോന്നിയത് ചിലര് കാട്ടുന്ന അവഗണനയും അകല്ച്ചയും കണ്ടിട്ടാണെന്ന് വി.ഒ. മണിക്കുട്ടനും രമേഷ് ഗോപിയും പറയുന്നു.
ചിലര് കാട്ടുന്ന അവഗണനയും അകല്ച്ചയും കോവിഡ് രോഗികള് നേരിടുന്ന ദു:ഖവും ഹൃദയം പൊള്ളിക്കുന്നതാണ്. കടകളിലും മറ്റും പോകുമ്പോള് കച്ചവടക്കാരും നാട്ടുകാരും രോഗികളോട് എന്നപേലെയാണ് തങ്ങളോട് പെരുമാറുന്നത്. പലര്ക്കും സംസാരിക്കാന് തന്നെ പേടിയാണെന്നും ഇവര് വ്യക്തമാക്കി.
”ഗള്ഫില് നിന്ന് വന്ന് ക്വാറന്റീനില് കഴിഞ്ഞ താഴത്തങ്ങാടി സ്വദേശിയെ ജനറല് ആശുപത്രിയില് പരിശോധനയ്ക്കായി കൊണ്ടുവരുന്ന സമയം. ആലുംമൂട് കഴിഞ്ഞപ്പോള് അദ്ദേഹം വിളിച്ചു. വണ്ടി ഒന്നു നിര്ത്താമോ വീട് കാണാനാണ് എന്നു പറഞ്ഞു. വണ്ടി തിരിച്ചു വിട്ട് വീട് അദ്ദേഹത്തിനു കാണിച്ചു കൊടുത്ത കാര്യം ഓര്മിക്കുന്നു”വെന്ന് ഡ്രൈവര്മാര് പറയുന്നു.
അതേസമയം കാരുണ്യരഹിതമായ പെരുമാറ്റമാണു പലപ്പോഴും തിരിച്ചുകിട്ടുക. ഒരിക്കല് രോഗിയെ മണിമലയില് എത്തിച്ച ശേഷം പൊലീസ് സ്റ്റേഷനു സമീപം സൗകര്യപ്രദമായ സ്ഥലത്ത് ആംബുലന്സ് നിര്ത്തി. ചായ കുടിക്കാന് പോയി. സ്റ്റേഷനില് നിന്ന് പൊലീസുകാരന് ഇറങ്ങിവന്ന് വണ്ടി മാറ്റാന് ആവശ്യപ്പെട്ടു. കാരണം രോഗഭീതി. ഉടന് ആംബുലന്സ് മാറ്റിക്കൊടുത്തു, മണിക്കുട്ടനും രമേഷ് ഗോപിയും ഓര്മിക്കുന്നു.
കോട്ടയം ജില്ലയില് 17 ആംബുലന്സുകളാണ് കോവിഡ് രോഗവുമായി ബന്ധപ്പെട്ട് പ്രവര്ത്തിക്കുന്നത്. 7 ആംബുലന്സുകള് കോട്ടയം ജനറല് ആശുപത്രിയിലും ബാക്കിയുള്ളവ പാമ്പാടി, കാഞ്ഞിരപ്പള്ളി, പാലാ, വൈക്കം, ചങ്ങനാശേരി എന്നീ സര്ക്കാര് ആശുപത്രികളും കേന്ദ്രീകരിച്ചാണ് സേവനം ചെയ്യുന്നത്.
8 ആംബുലന്സുകള് 24 മണിക്കൂറും സേവനം ചെയ്യുന്നവയും 7 ആംബുലന്സുകള് 12 മണിക്കൂര് സേവനവും ചെയ്യുന്നവയുമാണ്. ഈ ആംബുന്സുകളില് 21 ഡ്രൈവര്മാരും ഇത്രയും തന്നെ നഴ്സുമാരും സേവനസന്നദ്ധരായുണ്ട്.
Discussion about this post