തിരുവനന്തപുരം: സംസ്ഥാനത്ത് കൊറോണ ബാധിതരുടെ എണ്ണം ഉയരുകയാണ്. അതിനിടെ അഞ്ചാംഘട്ട ലോക്ക് ഡൗണിലെ ഇളവുകളുടെ ഭാഗമായി ആരാധനാലയങ്ങള്‍ തുറക്കാന്‍ ഒരുങ്ങുകയാണ്. എന്നാല്‍ ആരാധനാലയങ്ങള്‍ തുറക്കാന്‍ കേന്ദ്രത്തിന്റെ തീരുമാനം വന്നതിന് പിന്നാലെ വിവിധ കോണുകളില്‍ നിന്ന് എതിര്‍പ്പുകള്‍ ഉയര്‍ന്നുകൊണ്ടിരിക്കുകയാണ്.
കേരളത്തില്‍ ആരാധനാലങ്ങള്‍ തുറക്കുന്നത് രോഗത്തിന്റെ വ്യാപനം നിയന്ത്രണാതീതമാക്കുമെന്നാണ് ഐഎംഎ കേരള ഘടകം അഭിപ്രായപ്പെട്ടത്. ഇതേ അഭിപ്രായം തന്നെയാണ് ഇന്‍ഫോ ക്ലിനിക്കിലൂടെ ശ്രദ്ധേയനായ ഡോക്ടര്‍ നെല്‍സണും പങ്കുവെക്കുന്നത്.
ഫേസ്ബുക്കിലൂടെയാണ് അദ്ദേഹം തന്റെ അഭിപ്രായം തുറന്നുപറഞ്ഞത്. ക്രൈസ്തവ ദേവാലയങ്ങള്‍ തുറക്കുന്നതിനെ മുന്‍നിര്‍ത്തിയാണ് നെല്‍സണ്‍ ജോസഫ് തന്റെ അഭിപ്രായം പ്രകടിപ്പിച്ചത്. ഞായറാഴ്ച രണ്ട് കുര്‍ബാനയാണ് മിക്കയിടത്തും. ചില വലിയ പള്ളികളില്‍ അതിലും കൂടുതലുണ്ടാവും. അതില്‍ വിശ്വാസികള്‍ വന്ന് പള്ളി നിറയുന്ന രീതിയാണ് സാധാരണയെന്ന് നെല്‍സണ്‍ ജോസഫ് പറയുന്നു.
ജൂണ്‍ ഒന്നിന് നമ്മുടെ രാജ്യത്ത് 1.9 ലക്ഷമായിരുന്നു കൊറോണ ബാധിതരുടെ എണ്ണമെങ്കില്‍ ഇപ്പൊ 2.3 ലക്ഷം കടന്നു. ചുരുക്കിപ്പറഞ്ഞാല്‍ ഒരാഴ്ച പോലുമെടുത്തില്ല അരലക്ഷത്തോളം കൂടാന്‍ എന്ന്. അത്രയും കേസുകള്‍ ഇല്ലാതിരുന്ന സാഹചര്യത്തില്‍ ആരാധനാലയങ്ങള്‍ വഴി ആളുകളിലേക്ക് രോഗം പകര്‍ന്ന സാഹചര്യം ഓര്‍ക്കുന്നുണ്ടല്ലോയെന്നും നെല്‍സണ്‍ ജോസഫ് പറയുന്നു.
കേരളത്തില്‍ കേസുകള്‍ ഇത്ര കുറവായിരിക്കാന്‍ കാരണം ഒരു വ്യക്തിക്ക് രോഗം വന്നാല്‍ അയാളുമായി സമ്പര്‍ക്കത്തില്‍ വരാനിടയുള്ള എല്ലാവരെയും ട്രേസ് ചെയ്ത്, ഐസൊലേറ്റ് ചെയ്ത് അവരില്‍ നിന്ന് മറ്റുള്ളവരിലേക്ക് പകരാനുള്ള സാധ്യത പൂര്‍ണമായും ഒഴിവാക്കാന്‍ ശ്രമിച്ചതുകൊണ്ടുകൂടിയാണെന്നും നെല്‍സണ്‍ ജോസഫ് വ്യക്തമാക്കി.
ഫേസ്ബുക്ക് കുറിപ്പിന്റെ പൂര്‍ണരൂപം
തെറി കേള്‍ക്കാനിടയുണ്ട് എന്ന് കരുതിത്തന്നെ ഇടുന്ന പോസ്റ്റാണ്.
ആരാധനാലയങ്ങള്‍ തുറക്കുന്നതിനെക്കുറിച്ച് തന്നെയാണ്. പ്രത്യേകിച്ച് ക്രൈസ്തവ ദേവാലയങ്ങള്‍.
പത്താം ക്ലാസ് വരെ പള്ളിയില്‍ അള്‍ത്താര ബാലനായി കുര്‍ബാനയ്ക്ക് കൂടിയിട്ടുള്ളതാണ്. വേദപാഠവും പഠിച്ചിട്ടുള്ളതാണ്. അന്നുതൊട്ട് ഇന്ന് വരെ കാണുന്ന കുര്‍ബാനകള്‍ക്കൊക്കെയും ചില പ്രത്യേകതകളുണ്ടായിരുന്നു.
അര മണിക്കൂറുകൊണ്ട് പെട്ടെന്ന് തീരുന്ന കുര്‍ബാന തൊട്ട് പ്രസംഗത്തിന്റെ നീളമനുസരിച്ച് മുക്കാല്‍ മണിക്കൂറോ ഒരു മണിക്കൂറോ വരെയും പിന്നെ ആഘോഷമായ പാട്ടുകുര്‍ബാനയുമൊക്കെ കൂടിയിട്ടുണ്ട്..
പറഞ്ഞ് വന്നത് ഇതാണ്. അത്രയും നേരം പള്ളിയില്‍ നില്‍ക്കേണ്ടിവരുന്നുണ്ട്. ഞായറാഴ്ച രണ്ട് കുര്‍ബാനയാണ് മിക്കയിടത്തും. ചില വലിയ പള്ളികളില്‍ അതിലും കൂടുതലുണ്ടാവും. അതില്‍ വിശ്വാസികള്‍ വന്ന് പള്ളി നിറയുന്ന രീതിയാണ് സാധാരണ.
അത്രയും കാര്യങ്ങള്‍ മനസില്‍ ഇരിക്കെത്തന്നെ മറ്റ് ചില കാര്യങ്ങള്‍ കൂടി ആലോചിക്കാം
ഇന്നലെ 111 പേര്‍ക്കാണ് കൊവിഡ് സ്ഥിരീകരിച്ചത്. ജൂണ്‍ ഒന്നിന് നമ്മുടെ രാജ്യത്ത് 1.9 ലക്ഷമായിരുന്നു എണ്ണമെങ്കില്‍ ഇപ്പൊ 2.3 ലക്ഷം കടന്നു. ചുരുക്കിപ്പറഞ്ഞാല്‍ ഒരാഴ്ച പോലുമെടുത്തില്ല അരലക്ഷത്തോളം കൂടാന്‍ എന്ന്.
അത്രയും കേസുകള്‍ ഇല്ലാതിരുന്ന സാഹചര്യത്തില്‍ ആരാധനാലയങ്ങള്‍ വഴി ആളുകളിലേക്ക് രോഗം പകര്‍ന്ന സാഹചര്യം ഓര്‍ക്കുന്നുണ്ടല്ലോ.
കേരളത്തില്‍ കേസുകള്‍ ഇത്ര കുറവായിരിക്കാന്‍ കാരണം ഒരു വ്യക്തിക്ക് രോഗം വന്നാല്‍ അയാളുമായി സമ്പര്‍ക്കത്തില്‍ വരാനിടയുള്ള എല്ലാവരെയും ട്രേസ് ചെയ്ത്, ഐസൊലേറ്റ് ചെയ്ത് അവരില്‍ നിന്ന് മറ്റുള്ളവരിലേക്ക് പകരാനുള്ള സാദ്ധ്യത പൂര്‍ണമായും ഒഴിവാക്കാന്‍ ശ്രമിച്ചതുകൊണ്ടുകൂടിയാണ്
ആരോഗ്യമുള്ളവരെ ആരാധനാലയങ്ങളില്‍ പോവാന്‍ അനുവദിച്ചുകൂടേ എന്നും ചോദിക്കാം. പക്ഷേ അവര്‍ തിരികെ വീട്ടില്‍ വന്ന് കുഞ്ഞുങ്ങളുമായും പ്രായം ചെന്നവരുമായും രോഗികളുമായും ഇടപെടില്ല എന്നത് എങ്ങനെ ഉറപ്പാക്കും
അത് മാത്രമല്ല, വലിയ പള്ളികളില്‍ ചിലവയില്‍ പല ഇടങ്ങളില്‍ നിന്ന് വരുന്ന ആളുകള്‍ ഒന്നിച്ചു ചേരുന്നതും പതിവാണ്. എവിടെ നിന്ന് വന്നെന്നോ എങ്ങോട്ട് പോവുന്നെന്നോ ആരാണെന്നോ ഒക്കെപ്പോലും അറിയാന്‍ കഴിയണമെന്നില്ല.
ആദ്യം പറഞ്ഞപോലെ അത്രയും സമയം അടുത്തിടപഴകുന്നത്, കുര്‍ബാന സ്വീകരണത്തിന്റെ സമയത്ത് ഒരാള്‍ തന്നെ പലര്‍ക്ക് കുര്‍ബാന നല്‍കുന്നത് ഒക്കെയും രോഗവ്യാപനത്തിന്റെ സാദ്ധ്യത വര്‍ദ്ധിപ്പിക്കാനിടയുണ്ട്.
ഇപ്പോള്‍ത്തന്നെ തിരുവനന്തപുരത്തെയും കോഴിക്കോട്ടെയും ജുമാ മസ്ജിദുകള്‍ തുറക്കേണ്ടതില്ല എന്ന തീരുമാനം കൈക്കൊണ്ടിട്ടുണ്ട്.
അത് പിന്തുടര്‍ന്ന് അതേ പോലെ വിവേകപൂര്‍വം പള്ളികളും തീരുമാനങ്ങളെടുക്കണം എന്നാണ് അഭ്യര്‍ഥന..
Discussion about this post