ഗുരുവായൂര്‍: കോര്‍പ്പറേഷന്‍ ബാങ്ക് ഗുരുവായൂര്‍ ശാഖാ മാനേജര്‍ ബാങ്കിനുള്ളില്‍ തൂങ്ങി മരിച്ച നിലയില്‍. പാലക്കാട് ചെര്‍പ്പുളശ്ശേരി കാറല്‍മണ്ണ പാപ്പറമ്പത്ത് വീട്ടില്‍ അയ്യപ്പനാണ് (57) ബാങ്കില്‍ ജീവനൊടുക്കിയത്. വെള്ളിയാഴ്ച രാവിലെ എട്ടുമണിയോടെ മാനേജരുടെ കാബിനുള്ളിലെ ഫാനില്‍ കസവ് ഷാളില്‍ തൂങ്ങിമരിച്ചതായി കണ്ടെത്തുകയായിരുന്നു.
ശുചീകരണ ജീവനക്കാരി രാവിലെ എത്തിയപ്പോഴാണ് സംഭവം കണ്ടത്. ഉടനെ പോലീസില്‍ വിവരം അറിയിക്കുകയായിരുന്നു. രാവിലെ 7.50-ന് മാനേജര്‍ ബാങ്കിലെത്തിയതായി സിസിടിവി ദൃശ്യങ്ങളിലുണ്ട്. കാഷ് കൗണ്ടറിന്റെ തൊട്ടടുത്താണ് മാനേജരുടെ കാബിന്‍. കാഷ് കൗണ്ടറിലുള്ള സിസിടിവി ദൃശ്യങ്ങള്‍ പോലീസ് പരിശോധിക്കുകയും ചെയ്തു.
അതേസമയം, ആത്മഹത്യയ്ക്കുള്ള കാരണം വ്യക്തമായിട്ടില്ലെന്ന് പോലീസ് പറഞ്ഞു. കഴിഞ്ഞ രണ്ടുദിവസങ്ങളിലായി ബാങ്കില്‍ ഓഡിറ്റിങ് നടന്നിരുന്നു. പത്തുമാസമേ ആയിട്ടുള്ളൂ അയ്യപ്പന്‍ ഗുരുവായൂര്‍ കോര്‍പ്പറേഷന്‍ ബാങ്ക് മാനേജരായിട്ട്. തെക്കേനടയില്‍ പന്തായില്‍ ക്ഷേത്രത്തിനടുത്താണ് താമസം. പരേതരായ ഇട്ടീരിയുടെയും നീലിയുടെയും മകനാണ്. ഭാര്യ: ശൈലജ. മക്കള്‍: അനീഷ്, അജീഷ് (ഇരുവരും വിദ്യാര്‍ഥികള്‍). സഹോദരങ്ങള്‍: നീലി, ഭാരതി, ജാനകി, അമ്മിണി, കൃഷ്ണന്‍, ശങ്കരന്‍.
Discussion about this post