കൊച്ചി: അകാലത്തിൽ വിട്ടുപോയ മലയാളികളുടെ പ്രിയനടൻ രവി വള്ളത്തോളിനെ അനുസ്മരിച്ച് നടൻ മമ്മൂട്ടി. ദൂരദർശനുവേണ്ടി ആദ്യമായി തന്നെ അഭിമുഖം ചെയ്തത് രവി വള്ളത്തോളായിരുന്നുവെന്ന് മമ്മൂട്ടി ഓർമ്മിക്കുന്നു. സംസ്ഥാന അവാർഡ് വാങ്ങി പുറത്തിറങ്ങിയ ഉടനെ ആൾക്കൂട്ടത്തിനിടയിൽ നിന്നും രവി വള്ളത്തോൾ ചോദ്യങ്ങളുമായി എത്തിയത് മമ്മൂട്ടി ഫേസ്ബുക്ക് കുറിപ്പിലൂടെ ഓർത്തെടുക്കുകയാണ്.
ഊഷ്മളമായ ഓർമ്മകൾ ഒരുപാടുള്ള പ്രിയപ്പെട്ട സുഹൃത്തായിരുന്നു രവി. വിയോഗവാർത്ത വേദനയോടെയാണ് കേട്ടതെന്നും മമ്മൂട്ടി കുറിച്ചു. അതേസമയം, നിരവധി ചിത്രങ്ങളിൽ മമ്മൂട്ടിയും രവി വള്ളത്തോളും ഒന്നിച്ചിട്ടുണ്ട്. മമ്മൂട്ടിയുടെ ഹിറ്റ് ചിത്രമായ കോട്ടയം കുഞ്ഞച്ചനിൽ നല്ലൊരു വേഷം രവി വള്ളത്തോൾ അവതരിപ്പിക്കുകയും ചെയ്തിരുന്നു.
രവി വള്ളത്തോളിന്റെ ഓർമ്മകളുമായി മമ്മൂട്ടി പോസ്റ്റ് ചെയ്ത ഫേസ്ബുക്ക് കുറിപ്പ്:
രവി വള്ളത്തോളിന്റെ വിയോഗവാർത്ത വേദനയോടെയാണ് കേട്ടത്. ഊഷ്മളമായ ഓർമകൾ ഒരുപാടുള്ള പ്രിയപ്പെട്ട സുഹൃത്തായിരുന്നു രവി. ആദ്യമായി എന്നെ ദൂരദർശനുവേണ്ടി ഇന്റർവ്യൂ ചെയ്തത് രവിയായിരുന്നു. സംസ്ഥാന അവാർഡ് വാങ്ങി പുറത്തിറങ്ങിയപ്പോൾ അന്ന് ആൾക്കൂട്ടത്തിൻറെ തിരക്കിനിടെ വന്ന് ചോദ്യങ്ങൾ ചോദിച്ച രവിയെ എനിക്ക് നല്ല ഓർമയുണ്ട്. പിന്നെ ഒരുപാട് സിനിമകളിൽ ഒരുമിച്ച് അഭിനയിച്ചു. അടൂർ സാറിന്റെ മതിലുകളിൽ അടക്കം ഒപ്പമുണ്ടായിരുന്നു. എപ്പോഴും വിളിക്കുകയും കാണാൻ വരികയും ഒക്കെ ചെയ്ത ആ നല്ല സുഹൃത്തിന്റെ വേർപാട് എന്നെ ഒരുപാട് വേദനിപ്പിക്കുന്നു. ആദരാഞ്ജലികൾ.
Discussion about this post