കൊല്ലം: ശബരിമലയില്‍ നിരോധനാജ്ഞ ലംഘിച്ചതിന് അറസ്റ്റിലായി ജാമ്യമെടുത്തിട്ടും പുറത്തിറങ്ങാനാകാതെ വിവിധ കേസുകളിലായി കോടതികളും പോലീസ് സ്‌റ്റേഷനും കയറി ഇറങ്ങുന്ന ബിജെപി സംസ്ഥാന ജനറല്‍ സെക്രട്ടറി കെ സുരേന്ദ്രന് ഒടുവില്‍ പൂജപ്പുര സെന്‍ട്രല്‍ ജയിലില്‍ എത്തി. എന്നാല്‍ ജയിലില്‍ എത്തിയിട്ടും രക്ഷയില്ലാതെ പ്രൊഡക്ഷന്‍ വാറന്റുകളുടെ പെരുമഴയാണ് കെ സുരേന്ദ്രന് എതിരെ. പഴയ രാഷ്ട്രീയ കേസുകളിലും മറ്റ് കേസുകളിലുമായി 6 വാറന്റുകളാണ് ഇന്നലെ ജയിലിലേക്കെത്തിയത്. അതില്‍ നെയ്യാറ്റിന്‍കര കോടതിയിലെ വാറന്റില്‍ ഇന്നു രാവിലെ സുരേന്ദ്രനെ ഹാജരാക്കും. എറണാകുളം, കോഴിക്കോട് ജില്ലകളില്‍ നിന്നു 2 വീതവും റാന്നിയില്‍ നിന്ന് ഒരു വാറന്റുമാണ് ഇന്നലെ പോലീസ് ഹാജരാക്കിയത്.
സുരേന്ദ്രന്റെ അപേക്ഷപ്രകാരമാണു പൂജപ്പുരയിലേക്കു മാറ്റിയത്. കണ്ണൂര്‍ മജിസ്‌ട്രേട്ട് കോടതിയില്‍ ഹാജരാക്കിയശേഷം പൂജപ്പുരയിലേക്കുള്ള യാത്രയില്‍ സുരേന്ദ്രന് അല്‍പ സമയം ചേര്‍ത്തല പോലീസ് സ്റ്റേഷനില്‍ വിശ്രമിക്കാന്‍ സമയം നല്‍കി. പാര്‍ട്ടി പ്രവര്‍ത്തകര്‍ എത്തിയെങ്കിലും കാണാന്‍ അനുവദിച്ചില്ല. ശേഷം അര മണിക്കൂറോളം കഴിഞ്ഞു കൊട്ടാരക്കരയിലേക്കു കൊണ്ടുപോയി. രണ്ടു മണിക്കൂര്‍ കൊട്ടാരക്കര ജയിലില്‍ വിശ്രമിച്ച ശേഷം വൈകിട്ട് ആറോടെയാണു പൂജപ്പുരയില്‍ എത്തിച്ചത്. സുരേന്ദ്രന്റെ ആവശ്യപ്രകാരമായിരുന്നു വിശ്രമം. തുടര്‍ച്ചയായ യാത്രയില്‍ നടുവേദനയെന്ന് അദ്ദേഹം ഉദ്യോഗസ്ഥരോടു പറഞ്ഞിരുന്നു. ശബരിമല ചിത്തിര ആട്ട വിശേഷത്തിന് എത്തിയ അന്‍പത്തിരണ്ടുകാരിയെ തടഞ്ഞതുമായി ബന്ധപ്പെട്ട് അറസ്റ്റിലായ സുരേന്ദ്രന്റെ ജാമ്യാപേക്ഷ പത്തനംതിട്ട സെഷന്‍സ് കോടതി ഇന്നു പരിഗണിക്കും. സംഭവം നടക്കുമ്പോള്‍ ആ പരിസരത്ത് ഇല്ലാതിരുന്ന സുരേന്ദ്രനെ ഗൂഢാലോചന, കുറ്റകരമായ നരഹത്യയ്ക്കു ശ്രമം എന്നീ വകുപ്പുകളിലാണ് പ്രതി ചേര്‍ത്തത്.
അതേസമയം, തന്നെ കണ്ണൂര്‍ സെന്‍ട്രല്‍ ജയിലിലാക്കാന്‍ ഉന്നത പോലീസ് ഉദ്യോഗസ്ഥരുടെ സമ്മര്‍ദമുണ്ടായിരുന്നതായി സുരേന്ദ്രന് ആരോപിച്ചു. കൊട്ടാരക്കരയില്‍ നിന്ന് പൂജപ്പുരയിലേക്കു കൊണ്ടുപോകവെ, മാധ്യമങ്ങള്‍ക്കു നല്‍കാന്‍ പാര്‍ട്ടി പ്രവര്‍ത്തകനെ ഏല്‍പിച്ച കുറിപ്പിലാണ് ആരോപണങ്ങള്‍.
Discussion about this post