അഞ്ചു കിലോമീറ്റർ ദൂരം വാഹനമോടിച്ച് യുവാവെത്തി; ചോദിച്ചപ്പോൾ മൊട്ടുസൂചി വാങ്ങാനെന്ന് മറുപടി; അമ്പരന്ന പോലീസ് വാഹനം പിടിച്ചെടുത്ത് യുവാവിനെ തിരിച്ച് നടത്തി

പത്തനംതിട്ട: സംസ്ഥാനത്ത് ശക്തമായ പരിശോധനയാണ് പോലീസ് നടത്തുന്നത്. ലോക്ക് ഡൗൺ ലംഘിച്ച് അനാവശ്യമായി പുറത്തിറങ്ങുന്നത് ചിലർ പതിവാക്കിയിരിക്കുകയാണ്. അടൂരിൽ ശക്തമായ പരിശോധനാ നഗരത്തിൽ നടക്കുമ്പോഴാണ് പറക്കോട് ഭാഗത്തുനിന്നും ഇരുചക്രവാഹനത്തിൽവന്ന യാത്രക്കാരനെ പോലീസ് കൈകാണിച്ച് നിർത്തിയത്.

യാത്രക്കാരനോട് എവിടേക്കാണ് യാത്ര എന്ന് ചോദിച്ച പോലീസിന് കിട്ടിയ മറുപടിയിൽ ഒന്ന് അമ്പരക്കുകയാണ്. മൊട്ടുസൂചി വാങ്ങാൻ കടയിൽ വരെ പോകുന്നു എന്നായിരുന്നു മറുപടി.

അഞ്ചുകിലോമീറ്റർ ദൂരം വാഹനം ഓടിച്ച് മൊട്ടുസൂചി വാങ്ങാൻ എത്തിയ ആളുടെ വാഹനം ഇതോടെ പോലീസ് പൊക്കി. മൊട്ടുസൂചി വാങ്ങാൻ വന്ന ആൾ വീടുപറ്റാൻ പറക്കോട് ഭാഗത്തേക്ക് വെയിൽ കനക്കും മുൻപ് നടന്നുപോവുകയായിരുന്നു.