മലപ്പുറം: കൊറോണ വൈറസ് പ്രതിരോധ പ്രവർത്തനങ്ങൾക്ക് കരുത്ത് പകരാൻ സഹായവുമായി വയനാട് എംപി രാഹുൽ ഗാന്ധി. മലപ്പുറം ജില്ലയ്ക്ക് രാഹുൽ ഗാന്ധി യുടെ സഹായം ബുധനാഴ്ച കൈമാറി. കൊവിഡ് 19 പ്രതിരോധ നടപടികളിൽ ഉപയോഗപ്പെടുത്തുന്നതിനായി രാഹുലിന്റെ നിർദേശ പ്രകാരം ജില്ലയിലേക്ക് അനുവദിച്ച മാസ്‌കുകൾ, സാനിറ്റൈസറുകൾ, തെർമോ മീറ്ററുകൾ എന്നിവ എപി അനിൽ കുമാർ എംഎൽഎ ജില്ലാ കളക്ടർ ജാഫർ മാലികിന് കൈമാറി.
രാഹുലിന്റെ സഹായം ഇതുവരെ ലഭിച്ചത് വയനാട്, കോഴിക്കോട്, മലപ്പുറം ജില്ലകൾക്കാണ്. ജില്ലയിൽ ആവശ്യാനുസരണം വിതരണം ചെയ്യുന്നതിനാണ് കളക്ടർമാർക്ക് സാമഗ്രികൾ എത്തിക്കുന്നതെന്ന് എപി അനിൽകുമാർ പറഞ്ഞു. കൂടുതൽ എംപി ഫണ്ട് അനുവദിക്കുന്നതുമായി ബന്ധപ്പെട്ട മലപ്പുറം ജില്ലയുടെ ആവശ്യത്തിന്മേൽ ഉടൻ മറുപടി നൽകുമെന്നും എംഎൽഎ പറഞ്ഞു. നേരത്തെ, കൊവിഡ് 19 മുൻകൂട്ടി കണ്ടെത്താൻ സഹായിക്കുന്ന തെർമൽ സ്‌കാനറുകൾ രാഹുൽ ഗാന്ധിയുടെ നേതൃത്വത്തിൽ വയനാട് മണ്ഡലത്തിൽ വിതരണം ചെയ്തിരുന്നു.
Discussion about this post