മലപ്പുറം: സംസ്ഥാനത്തിന് ആശ്വാസം പകര്‍ന്ന് പുതിയ റിപ്പോര്‍ട്ട്. മലപ്പുറം ജില്ലയില്‍ വിദഗ്ധ പരിശോധനാ ഫലം ലഭിച്ച 130 പേര്‍ക്ക് വൈറസ് ബാധയില്ലെന്ന് സ്ഥിരീകരിച്ചു. ജില്ലാ കളക്ടര്‍ ജാഫര്‍ മലിക് ആണ് ഇക്കാര്യം അറിയിച്ചത്. 196 സാമ്പിളുകളാണ് പരിശോധനയ്ക്ക് അയച്ചിരിക്കുന്നത്. ആശങ്കപ്പെടേണ്ട സാഹചര്യം നിലവില്‍ ഇല്ലെന്ന് കൊവിഡ് 19 പ്രതിരോധ മുഖ്യ സമിതിയുടെ അവലോകന യോഗത്തില്‍ ജില്ലാ കളക്ടര്‍ പറഞ്ഞു.
247 പേരാണ് ജില്ലയില്‍ ഇപ്പോള്‍ പ്രത്യേക നിരീക്ഷണത്തിലുള്ളത്. 31 പേര്‍ ഐസൊലേഷന്‍ വാര്‍ഡുകളിലും 216 പേര്‍ വീടുകളില്‍ സ്വയം നിരീക്ഷണത്തിലുമാണ്. മഞ്ചേരി ഗവ. മെഡിക്കല്‍ കോളേജ് ആശുപത്രിയില്‍ 24 പേരും തിരൂരങ്ങാടി താലൂക്ക് ആശുപത്രിയില്‍ നാലുപേരും തിരൂര്‍ ജില്ലാ ആശുപത്രിയില്‍ മൂന്നുപേരുമാണ് ഐസൊലേഷന്‍ വാര്‍ഡുകളില്‍ നിരീക്ഷണത്തിലുള്ളത്. വൈറസ് ബാധയില്ലെന്നു സ്ഥിരീകരിച്ച 20 പേര്‍ ആശുപത്രി വിട്ടതായി ജില്ലാ മെഡിക്കല്‍ ഓഫീസര്‍ ഡോ. കെ സക്കീന അറിയിച്ചു. 32 പേര്‍ക്കു കൂടി ഇന്നലെ (മാര്‍ച്ച് 14) മുതല്‍ നിരീക്ഷണം ഏര്‍പ്പെടുത്തി.
പ്രത്യേക നിരീക്ഷണത്തില്‍ നിര്‍ത്തേണ്ടവരുടെ എണ്ണം വര്‍ധിക്കുകയാണെങ്കില്‍ സര്‍ക്കാര്‍ ആശുപത്രികള്‍ക്കു പുറമെ സ്വകാര്യ ആശുപത്രികളിലെ സൗകര്യങ്ങളും ഉപയോഗപ്പെടുത്താന്‍ തീരുമാനമായി. ജില്ലാ പഞ്ചായത്ത് പ്രസിഡന്റ് എപി ഉണ്ണികൃഷ്ണന്‍, ജില്ലാ പോലീസ് മേധാവി യു അബ്ദുള്‍ കരീം, അസിസ്റ്റന്റ് കളക്ടര്‍ രാജീവ്കുമാര്‍ ചൗധരി, എഡിഎം എന്‍എം മെഹറലി, ദുരന്ത നിവാരണ വിഭാഗം ഡെപ്യൂട്ടി കലക്ടര്‍ പിഎന്‍ പുരുഷോത്തമന്‍, ഡെപ്യൂട്ടി ഡിഎംഒ ഡോ. കെ മുഹമ്മദ് ഇസ്മയില്‍, എന്‍എച്ച്എം പ്രോഗ്രാം മാനേജര്‍ ഡോ. എ ഷിബുലാല്‍ തുടങ്ങിയവരും യോഗത്തില്‍ പങ്കെടുത്തു.
Discussion about this post