നെടുമ്പാശ്ശേരി: ഇറ്റലിയില്‍ കുടുങ്ങിക്കിടന്ന മലയാളികളില്‍ 21 പേര്‍ നെടുമ്പാശ്ശേരി അന്താരാഷ്ട്ര വിമാനത്താവളത്തില്‍ വിമാനമിറങ്ങി. റോമില്‍ കുടുങ്ങിക്കിടന്നവരാണ് ഇന്ന് നാട്ടിലെത്തിയത്. അതേസമയം നിരീക്ഷണത്തിനായി ആലുവയിലെ ആശുപത്രിയിലേക്ക് മാറ്റിയിരിക്കുകയാണ്.
രാവിലെ 8 മണിയോടുകൂടിയാണ് ഇവര്‍ നെടുമ്പാശ്ശേരിയില്‍ എത്തിയത്. ദുബായ് വഴിയാണ് ഇവര്‍ വന്നത്. ഇന്ത്യയില്‍ നിന്ന് പോയ മെഡിക്കല്‍ സംഘം ഇവര്‍ക്ക് വൈറസ് ബാധയില്ലെന്ന് സ്ഥിരീകരിച്ച ശേഷമാണ് നാട്ടിലേക്ക് എത്തിച്ചത്. എന്നാല്‍ മുന്‍കരുതലിന്റെ ഭാഗമായിട്ടാണ് ഇവരെ ഇപ്പോള്‍ ആശുപത്രിയില്‍ നിരീക്ഷണത്തില്‍ വെച്ചിരിക്കുന്നത്.