റാന്നി: ഇറ്റലിയിൽ നിന്നെത്തിയ മലയാളി കുടുംബത്തിന് കൊറോണ വൈറസ് ബാധയാണെന്ന് ആദ്യം തിരിച്ചറിഞ്ഞ് നാടിനെ തന്നെ വലിയ വിപത്തിൽ നിന്നും രക്ഷിച്ച ഡോ. ശംഭുവിനെ അഭിനന്ദനങ്ങൾ കൊണ്ട് മൂടുകയാണ് സോഷ്യൽമീഡിയ. കൃത്യസമയത്ത് ആശുപത്രിയിൽ എത്തിച്ച് ഇവരെ പരിശോധയ്ക്ക് വിധേയമാക്കാൻ സാധിച്ചതാണ് കൂടുതൽ പേരിലേക്ക് കൊറോണ പടരുന്നത് തടയാൻ സാഹചര്യമൊരുക്കിയത്.
ഇത്തരത്തിൽ നാടൊന്നാകെ കോവിഡ് 19 രോഗം പടർന്ന് പിടിക്കുന്നതിൽ നിന്ന് നാടിനെ രക്ഷിച്ച ഡോക്ടർക്ക് നന്ദി പറയുകയാണ് കേരളം ഒന്നാകെ. റാന്നി താലൂക്ക് ആശുപത്രിയിലെ മെഡിക്കൽ സൂപ്രണ്ടാണ് ഡോക്ടർ ശംഭു മാമ്പറ്റ. ഇദ്ദേഹത്തിന്റെ ജാഗ്രതയാണ് ഇറ്റലിയിൽ നിന്നെത്തിയവർക്ക് കോവിഡ് ബാധയെന്ന് മനസിലാക്കുന്നതിനും കൃത്യമായി ഐസോലേറ്റ് ചെയ്ത് രോഗവ്യാപനം തടഞ്ഞതും.
ഡോക്ടറുടെ ജാഗ്രതയെ അഭിനന്ദിച്ച് നടൻ അജു വർഗീസ് അടക്കമുള്ളവർ സമൂഹ മാധ്യമങ്ങളിൽ അഭിനന്ദനവുമായി എത്തി. റാന്നിക്കാരുടെ സൂപ്പർഹീറോയാണ് ഡോക്ടറെന്നും സമയോചിതമായ ഇടപെടൽ ഇല്ലായിരുന്നുവെങ്കിൽ വൈറസ് നാടു മുഴുവൻ പരന്നേനെയെന്നും അദ്ദേഹം ഫേസ്ബുക്ക് കുറിപ്പ് പങ്കുവെച്ച് കൊണ്ട് വ്യക്തമാക്കി.
അജു വർഗ്ഗീസിന്റെ ഫേസ്ബുക്ക് പോസ്റ്റ്:
ഈ പത്തനംതിട്ട – ഇറ്റലി കൊറോണ കേസിൽ കൃത്യ സമയത്ത് ഇടപെട്ട കാരണം വലിയ വിപത്തിൽ നിന്നും നാടിനെ രക്ഷിച്ച ഒരു സൂപ്പർ ഹീറോ ഉണ്ട്. ആ സൂപ്പർ ഹീറോ ആണ് റാന്നി ഗവൺമന്റ് ആശുപത്രിയിലേ ഡോക്ടർ ശംഭൂ. ഈ മൂന്ന് ഇറ്റലിക്കാരുടെ വീടിന്റെ തൊട്ടടുത്ത് താമസ്സികുന്ന പനി വന്ന 2 അയൽവാസികൾ അത് കാണിക്കാൻ ചെന്നപ്പോൾ കൃത്യമായി കേസ് പഠിച്ച്, അപഗ്രഥിച്ച് മനസ്സിലക്കി ഉടൻ തന്നെ ആ ഇറ്റലിക്കാരെ (ആംബുലൻസിൽ കയറാൻ സമ്മതിച്ചില്ലത്രേ) അവരുടെ കാറിലാണേൽ അവരുടെ കാറിൽ ?? കൊണ്ട് വന്ന് ഐസൊലേറ്റ് ചെയ്ത കാരണം ഇത്രയും പേരിൽ ഇത് നിന്നൂ.
ഇല്ലെങ്കിൽ ഇവർ ഇനിയും നാട് മുഴുവൻ കറങ്ങി വൈറസ്സ് അങ്ങ് പറന്ന് അതി ഭീകര അവസ്ഥയിലേക്ക് നാട് പോയേനേം..!
Discussion about this post