കൊല്ലം: കൊല്ലത്ത് മരിച്ചനിലയിൽ കണ്ടെത്തിയ ദേവനന്ദയെ വീട്ടിൽ നിന്ന് തട്ടിക്കൊണ്ട് പോയതാകാമെന്ന് അമ്മ. കുട്ടിയുടെ മൃതദേഹം കണ്ടെത്തിയ പുഴയിലേക്ക് കുട്ടി ഇതുവരെ പോയിട്ടില്ലെന്നും അമ്മ ധന്യ പറയുന്നു. തന്നോട് പറയാതെ അവൾ എങ്ങോട്ടും പോകില്ലെന്നും അവർ വ്യക്തമാക്കി. തന്നോട് പറയാതെ മകൾ എങ്ങോട്ടും പോകാറില്ല. അതാണ് അവളെ ആരെങ്കിലും കൊണ്ടുപോയതാണോ എന്നതിൽ തനിക്ക് സംശയമുള്ളതെന്നും ധന്യ മാധ്യമങ്ങളോട് പറഞ്ഞു. നിമിഷനേരംകൊണ്ടാണ് ഇത് സംഭവിച്ചത്. അവളെ കാണാതായപ്പോൾ തന്നെ താൻ വിളിച്ചപ്പോൾ നാട്ടുകാരെല്ലാവരും വന്നു. സത്യാവസ്ഥ എന്താണെന്ന് തനിക്ക് അറിയണമെന്നും ധന്യ പറഞ്ഞു.
കുട്ടിയെ തട്ടിക്കൊണ്ടുപോയതാണെന്നാണ് ദേവനന്ദയുടെ മുത്തച്ഛനും ആരോപിക്കുന്നത്. ഒരിക്കൽപോലും ഇത്തിക്കരയാറിന്റെ ഭാഗത്തേക്ക് ദേവനന്ദ പോയിട്ടില്ല എന്ന് നാട്ടുകാരും പറയുന്നു. അതുകൊണ്ട് കുട്ടിയെ ആരെങ്കിലും തട്ടിക്കൊണ്ടുപോയതാകാമെന്നാണ് നാട്ടുകാരും പങ്കുവെയ്ക്കുന്ന സംശയം.
വിഷയത്തിൽ നല്ലരീതിയിൽ അന്വേഷണം വേണമെന്നാണ് അച്ഛൻ പ്രദീപിന്റെ ആവശ്യം. പോസ്റ്റ്മോർട്ടം റിപ്പോർട്ടിന് കാത്തിരിക്കുകയാണെന്നും അദ്ദേഹം കൂട്ടിച്ചേർത്തു. അന്വേഷണ ഉദ്യോഗസ്ഥർ ഇതുവരെ തങ്ങളോട് കാര്യങ്ങൾ വിശദീകരിച്ചിട്ടില്ലെന്നും അദ്ദേഹം പറയുന്നു.
അതേസമയം വരും ദിവസങ്ങളിൽ പോലീസ് ഇക്കാര്യങ്ങളിൽ കൂടുതൽ അന്വേഷണത്തിലേക്ക് കടക്കുമെന്നാണ് വിവരം. നാലു ദിവസത്തിനുള്ളിൽ അന്തിമ പോസ്റ്റ്മോർട്ടം റിപ്പോർട്ട് ലഭിക്കുമെന്നാണ് പോലീസ് പ്രതീക്ഷിക്കുന്നത്. റിപ്പോർട്ട് ലഭിച്ചാൽ മാത്രമേ മരണകാരണം സംബന്ധിച്ച് കൃത്യമായ വിവരം ലഭിക്കുവെന്നാണ് പോലീസ് പറയുന്നത്.
Discussion about this post