കോട്ടയം: കോട്ടയത്ത് കിണര്‍ ഇടിഞ്ഞ് വീണ് രണ്ടുപേര്‍ മരിച്ചു. പുന്നത്ര സ്വദേശികളായ ജോയ്, സാജു എന്നിവരാണ് മരിച്ചത്. കോട്ടയം പുന്നത്ര കമ്പനിക്കടവില്‍ കിണറില്‍ റിങ് താഴ്ത്തുന്നതിനിടെ മണ്ണിടിഞ്ഞ് വീണാണ് അപകടം.
രാവിലെ പതിനൊന്നരയോടെയായിരുന്നു അപകടം. ശബ്ദം കേട്ട് നാട്ടുകാര്‍ ഓടിയെത്തിയപ്പോഴെക്കും രണ്ടുപേരും മണ്ണിനടിയില്‍പ്പെട്ടിരുന്നു. ഒരാളെ നാട്ടുകാര്‍ ജീവനോടെ പുറത്തെത്തിച്ചെങ്കിലും ആശുപത്രിയിലേക്ക് പോകുന്നതിനിടെ മരണം സംഭവിച്ചിരുന്നു.
എന്നാല്‍ രണ്ടാമത്തെ ആളിന്റെ ദേഹത്തെക്ക് കൂടുതല്‍ മണ്ണ് വീണതിനാല്‍ ഇയാളെ പുറത്തെടുക്കാന്‍ താമസിച്ചിരുന്നു. ഇയാളെ പുറത്തെടുത്തപ്പോഴെക്കും മരണം സംഭവിച്ചിരുന്നു. മണ്ണിട്ട് നികത്തിയ പ്രദേശമായതുകൊണ്ട് മണ്ണിന് കാര്യമായ ഉറപ്പില്ലാത്തതാണ് ഇടിയാന്‍ കാരണമെന്നാണ് പ്രദേശവാസികള്‍ പറയുന്നത്.