കോഴിക്കോട്: ബസ് അപകടങ്ങള്‍ തുടര്‍ക്കഥയായി മാറുന്നു. പൂനൂര്‍ ചീനമുക്കില്‍ സ്വകാര്യ ബസ് നിയന്ത്രണം വിട്ട് മരത്തിലിടിച്ച് മുപ്പതോളം പേര്‍ക്ക് പരിക്കേറ്റു. മറ്റൊരു വാഹനത്തെ മറികടക്കുന്നതിനിടെയാണ് ബസ് നിയന്ത്രണം വിട്ടതെന്നാണ് പ്രാഥമിക റിപ്പോര്‍ട്ട്. അപകടത്തില്‍ നിരവധി പേര്‍ക്ക് പരിക്കേറ്റു.
കൊയിലാണ്ടി-താമരശ്ശേരി റൂട്ടിലോടുന്ന ആഞ്ജനേയ എന്ന ബസാണ് അപകടത്തില്‍പ്പെട്ടത്. ഈ സമയം ബസ്സില്‍ നിരവധി യാത്രക്കാരായിരുന്നു ഉണ്ടായിരുന്നത്. മുന്നിലുള്ള വാഹനത്തെ മറികടക്കുന്നതിനിടെ ബസ് നിയന്ത്രണം വിട്ട് മരത്തില്‍ ഇടിക്കുകയായിരുന്നു.
ഇടിയുടെ ആഘാതത്തില്‍ ബസ്സിന്റെ മുന്‍വശം തകര്‍ന്നു. പരിക്കേറ്റ യാത്രക്കാരെ പൂനൂരിലെ സ്വകാര്യ ആശുപത്രിയില്‍ പ്രവേശിപ്പിച്ചു. സാരമായി പരുക്കേറ്റ രണ്ടുപേരെ കോഴിക്കോട് മെഡിക്കല്‍ കോളേജ് ആശുപത്രിയിലേക്ക് മാറ്റി.
Discussion about this post