തൃശ്ശൂര്‍: വാലന്റൈന്‍സ് ദിനത്തില്‍ യാത്രക്കാര്‍ക്ക് സൗജന്യമായി ഹെല്‍മറ്റും പ്രണയ പുഷ്പങ്ങളും സമ്മാനിച്ച് പോലീസ്. ”ലവ് യുവര്‍ ലൈഫ്” എന്ന ആശയത്തില്‍ പ്രണയദിനത്തില്‍ ഹെല്‍മറ്റ് ധരിക്കാതെ എത്തിയ ടൂവീലര്‍ യാത്രക്കാര്‍ക്കാണ് സൗജന്യമായി ഹെല്‍മറ്റും പൂക്കളും ചോക്ലേറ്റും പിന്നെ റോഡ് സുരക്ഷാനിര്‍ദേശങ്ങളും പോലീസ് സമ്മാനിച്ചത്.
ട്രാഫിക് ബോധവല്‍കരണത്തിന്റെ ഭാഗമായായിരുന്നു പുതിയ പദ്ധതി. സൗജന്യമായി ഹെല്‍മറ്റ് ലഭിച്ചപ്പോള്‍ യാത്രക്കാര്‍ക്കും സന്തോഷമായി. ഹെല്‍മറ്റ് ധരിക്കാതെ എത്തിയവര്‍ പോലീസിന്റെ വലയിലായതോടെ ആദ്യമൊന്ന് ഞെട്ടി. എന്നാല്‍ ഹെല്‍മറ്റും പൂക്കളും ചോക്ലേറ്റും നല്‍കിയതോടെ പിന്നെ യാത്രക്കാര്‍ അമ്പരന്നു.
ക്രൈംബ്രാഞ്ച് ഐ.ജി ശ്രീജിത്ത് തന്നെ നേരിട്ടെത്തിയാണ് ഹെല്‍മറ്റ് ധരിക്കാത്ത ബൈക്ക് യാത്രക്കാര്‍ക്ക് പൂക്കളും ചോക്ലേറ്റും നല്‍കിയത്. റോഡപകടങ്ങള്‍ കുറയ്ക്കാന്‍ പോലീസ് നടത്തുന്ന ബോധവല്‍കരണം ഫലം കാണുന്നുവെന്ന വിലയിരുത്തലിലാണ് വാലന്റൈന്‍സ് ദിനത്തിലും ഇവര്‍ ഇറങ്ങിയത്.
Discussion about this post