കൊല്ലം: കൊല്ലത്ത് ദമ്പതികള്‍ക്ക് നേരെ സദാചാര ഗുണ്ടായിസം. രാത്രി കാറിലെത്തിയ ദമ്പതികളെ അഞ്ചംഗ സംഘം ആക്രമിക്കുകയായിരുന്നു. കൊല്ലം കാവനാട്ട് വെച്ചാണ് സംഭവം. കുണ്ടറ മുളവന സ്വദേശികളെയാണ് സദാചാര വാദികള്‍ ആക്രമിച്ചത്.
ശക്തികുളങ്ങര സ്വദേശികളായ സുനി, കണ്ണന്‍, കാവനാട് സ്വദേശി വിജയലാല്‍ തുടങ്ങിയവരാണ് ആക്രമണ സംഘത്തില്‍ ഉണ്ടായിരുന്നവരില്‍ ചിലര്‍. ഇവരെ പോലീസ് അറസ്റ്റ് ചെയ്തു. ബാക്കി രണ്ട് പേര്‍ക്കായി പോലീസ് തെരച്ചില്‍ ആരംഭിച്ചു.
കഴിഞ്ഞ ദിവസം രാത്രി പത്തരയോടെയാണ് സംഭവം. സുഹൃത്തിന്റെ വീട്ടില്‍ നിന്ന് സ്വന്തം വീട്ടിലേക്ക് മടങ്ങുകയായിരുന്നു ദമ്പതികള്‍. വഴിമധ്യേ കാര്‍ കേടായി. ഇത് പരിശോധിച്ചുകൊണ്ടിരിക്കുമ്പോഴാണ് യുവാവിന് നേരെ ചോദ്യങ്ങളുമായി അഞ്ചംഗ സംഘം എത്തിയത്. തുടര്‍ന്ന് ഇവരെ ആക്രമിക്കുകയായിരുന്നു എന്നാണ് ലഭിച്ച റിപ്പോര്‍ട്ട്.