തിരുവനന്തപുരം: ആലപ്പുഴ, തൃപ്പൂണിത്തുറ, കാസര്‍കോട് എന്നീ മൂന്ന് ഇടങ്ങളില്‍ ഉണ്ടായ വാഹനാപകടത്തില്‍ ആറ് പേര് കൊല്ലപ്പെട്ടു. മരണപ്പെട്ടവര്‍ വേറെ ജില്ലകളില്‍ ഉള്ളവര്‍.
മഞ്ചേശ്വരം കുഞ്ചത്തൂര്‍ പത്താം മൈലില്‍ കര്‍ണ്ണാടക സ്റ്റേറ്റ് ട്രാന്‍സ്‌പോര്‍ട്ട് കോര്‍പ്പറേഷന്റെ ബസും ബൈക്കും കൂട്ടിയിടിച്ചാണ് അപകടം. ബൈക്ക് യാത്രിക്കാരായ കാസര്‍കോട് കൂടല്‍ സ്വദേശികളായ സുനില്‍ (21) ജഗദീഷ്(22) എന്നിവരാണ് മരിച്ചത്. ബസിനെ മറികടക്കുന്നതിനിടെ ആയിരുന്നു അപകടം. സുനില്‍ സംഭവസ്ഥലത്ത് വെച്ച് തന്നെ മരണപ്പെട്ടു. ജഗദീഷിനെ ആശുപത്രിയിലേക്ക് കൊണ്ടുപോകും വഴിയുമാണ് മരിച്ചത്.
ദേശീയപാതയില്‍ ആലപ്പുഴ കളപ്പുര ജങ്ഷനിലും, തൃപ്പൂണിത്തുറയ്ക്കടുത്ത് ഇരുമ്പനത്തുമാണ് മറ്റ് രണ്ട് അപകടങ്ങള്‍ ഉണ്ടായത്. ആലപ്പുഴ കളപ്പുര ജംഗ്ഷനില്‍ ലോറിക്ക് പിന്നില്‍ ബൈക്ക് ഇടിച്ചായിരുന്നു അപകടം. അപകടത്തില്‍ ബൈക്ക് യാത്രികരായ രണ്ട് പേരും മരിച്ചു. കെഎല്‍ 40 എ 1064 നമ്പര്‍ ഹീറോ ഹോണ്ട ഗ്ലാമര്‍ ബൈക്കാണ് അപകടത്തില്‍ പെട്ടത്. മരിച്ചതില്‍ ഒരാളുടെ പേര് അജിത്ത് ബാബു എന്നാണ് രണ്ടാമത്തെ ആളെക്കുറിച്ച് വിവരം ലഭ്യമായിട്ടില്ല. മുന്നില്‍ പോവുകയായിരുന്ന ലോറി ബ്രേക്കിട്ടപ്പോള്‍ ബൈക്ക് ലോറിയില്‍ ഇടിക്കുകയായിരുന്നു. ഇതിന് പിന്നാലെ വന്ന ബസും ഇവരെ ഇടിച്ചതാണ് അപകടത്തിന്റെ തീവ്രത വര്‍ധിപ്പിച്ചത്.
തൃപ്പൂണിത്തുറ ഇരുമ്പനത്ത് ടാങ്കര്‍ ലോറിയുമായി കാര്‍ കൂട്ടിയിടിച്ചായിരുന്നു അപകടം. കാറിലുണ്ടായിരുന്ന തൊടുപുഴ സ്വദേശികളായ ഷൈല, അമ്മ ബില്‍ക്കിസ് എന്നിവരാണ് മരിച്ചത്. കാര്‍ ഓടിച്ചിരുന്ന ഷൈലയുടെ ഭര്‍ത്താവ് ഹസീഫിനെ ഗുരുതരമായ പരിക്കുകളോടെ ആശുപത്രിയില്‍ പ്രവേശിപ്പിച്ചു.
Discussion about this post