കൊച്ചി: അടുത്തിടെ വാര്‍ത്തകളില്‍ ഇടംപിടിക്കുന്നത് ടൂറിസ്റ്റ് ബസുകളുടെ അഭ്യാസ പ്രകടനങ്ങളാണ്. പിന്നാലെ നിയമലംഘനത്തിനുള്ള നടപടികളും. ഇപ്പോള്‍ ടൂറിസ്റ്റ് ബസുകളുടെ നിയമ ലംഘന പട്ടികയിലേയ്ക്ക് പുതിയൊരാള്‍ കൂടി എത്തിയിരിക്കുകയാണ്. ബസ് ഓടിക്കുമ്പോള്‍ രണ്ട് കൈയ്യും വിട്ട് ഡാന്‍സ് കളിച്ചാണ് ഈ ഡ്രൈവറുടെ അഭ്യാസം. പാട്ടില്‍ മുഴുകിയിരുന്നാണ് അഭ്യാസം.
സ്റ്റിയറിങ്ങില്‍ ശ്രദ്ധ കൊടുക്കുന്നതേയില്ല. അപകടകരമായ രീതിയില്‍ വാഹനമോടിക്കുന്ന ഇയാള്‍ കൈയ്യില്‍ ഇട്ട് അമ്മാനമാടുന്നത് സ്വന്തം ജീവന്‍ മാത്രമല്ല വാഹനത്തിലെ മറ്റു യാത്രക്കാരുടേയും കൂടി ജീവനാണ്. സംഭവം നടന്ന സ്ഥലമോ വാഹനമോടിച്ച ആളുടെ വിവരങ്ങളോ ഇതുവരെയും ലഭ്യമായിട്ടില്ല. സംഭവത്തിന്റെ വീഡിയോ ഇപ്പോള്‍ സമൂഹമാധ്യമങ്ങളില്‍ വൈറലാണ്.
കണ്ടെത്തിയാല്‍ ഉടന്‍ നടപടിയെന്നാണ് ലഭിക്കുന്ന വിവരം. നേരത്തെ ഇത്തരത്തില്‍ അപകടകരമായ രീതിയില്‍ വാഹനമോടിക്കുന്ന വിഡിയോകള്‍ വൈറലായതിനെ തുടര്‍ന്ന് നിരവധി ഡ്രൈവര്‍മാര്‍ക്കെതിരെ മോട്ടര്‍ വാഹന വകുപ്പ് നടപടിയെടുത്തിരുന്നു. എന്നിട്ടും നിയമലംഘനങ്ങള്‍ തുടര്‍ക്കഥയാകുന്നു എന്നതിന്റെ സൂചന കൂടിയാണ് ഈ വീഡിയോ.
Discussion about this post