മലപ്പുറം: പരപ്പനങ്ങാടിയിലെ ഹോട്ടലില്‍ വന്‍ കവര്‍ച്ച. ഹോട്ടലില്‍ നിന്ന് കാല്‍ ലക്ഷത്തോളം രൂപയുമായാണ് മോഷ്ടാവ് കടന്നുകളഞ്ഞത്. ഇന്ന് പുലര്‍ച്ചെ രണ്ടരയോടെയാണ് സംഭവം നടന്നത്. പയിനിങ്ങല്‍ ജങ്ഷനിലെ ഹോട്ടല്‍ ടോപ്പ് സിറ്റിയില്‍ കവര്‍ച്ച നടന്നത്.
പൂട്ട് തകര്‍ത്ത് അകത്തുകടന്ന മോഷ്ടാവിന്റെ ദൃശ്യങ്ങള്‍ ഹോട്ടലിനകത്തെ സിസിടിവിയില്‍ പതിഞ്ഞിട്ടുണ്ട്. ഷട്ടറുയര്‍ത്തി അകത്തുകടന്ന മോഷ്ടാവ് അടുക്കളയില്‍ നിന്ന് ചട്ടുകം കൊണ്ടുവന്ന് കൗണ്ടറിലെ പൂട്ടുകള്‍ തകര്‍ക്കുകയായിരുന്നു.
ഇവിടെ സൂക്ഷിച്ചിരുന്ന പണവും കൗണ്ടറിനുമുകളിലുണ്ടായിരുന്ന പള്ളികളുടേയും വിവിധ ചാരിറ്റി സംഘടനകളുടേയും സംഭാവന പെട്ടികളിലെ പണവും കവര്‍ന്നിട്ടുണ്ട്. ഇന്നു രാവിലെ ഹോട്ടല്‍ തുറക്കാനെത്തിയപ്പോഴാണ് സംഭവം അറിയുന്നത്. സംഭവത്തില്‍ പരപ്പനങ്ങാടി പോലീസ് കേസെടുത്ത് പ്രതിക്കായുള്ള അന്വേഷണം ആരംഭിച്ചു.