തൃശ്ശൂര്‍: കഴിഞ്ഞ ദിവസം കൊരട്ടിയില്‍ നിന്ന് കാണാതായ നാല് വിദ്യാര്‍ത്ഥികളെ കണ്ടെത്തി. പ്രദേശത്തെ ഒരു ജാതിക്ക തോട്ടത്തില്‍ ഒളിച്ചിരിക്കുന്ന നിലയില്‍ നാട്ടുകാരാണ് ഇവരെ കണ്ടെത്തിയത്. കഴിഞ്ഞ ദിവസം നാലുപേരും ചേര്‍ന്ന് പുകവലിച്ചിരുന്നു. ഇത് അധ്യാപകര്‍ കണ്ടുപിടിക്കുകയും ചെയ്തിരുന്നു. ഇത് അധ്യാപകര്‍ വീട്ടുകാരെ അറിയിക്കുമെന്ന ഭയത്തിലാണ് നാലുപേരും ഒളിച്ചോടിയത്.
വീട്ടുകാരെ അറിയിക്കുമെന്ന് ഭയന്നാണ് തങ്ങള്‍ തോട്ടത്തില്‍ പോയി ഒളിച്ചതെന്ന് എന്നാണ് വിദ്യാര്‍ത്ഥികള്‍ പോലീസിനോട് പറഞ്ഞത്. നാലുപേരും ഒമ്പതാം ക്ലാസിലാണ് പഠിക്കുന്നത്. കുട്ടികളെ കാണാനില്ലെന്ന് കാണിച്ച് കഴിഞ്ഞ ദിവസം ഇവരുടെ മാതാപിതാക്കള്‍ കൊരട്ടി പോലീസില്‍ പരാതി നല്‍കിയിരുന്നു.
ഇതേ തുടര്‍ന്ന് കേസ് രജിസ്റ്റര്‍ ചെയ്ത് പോലീസ് അന്വേഷണം ആരംഭിച്ചിരുന്നു. വൈകീട്ട് വിദ്യാര്‍ത്ഥികളെ ചാലക്കുടി റെയില്‍വെ സ്റ്റേഷന്‍ പരിസരത്ത് കണ്ടതായി പോലീസിന് വിവരം ലഭിച്ചിരുന്നു. ഇതേ തുടര്‍ന്ന് അന്വേഷണം മറ്റു ജില്ലകളിലേക്ക് കൂടി വ്യാപിപ്പിച്ചതിന് പിന്നാലെയാണ് ഇവരെ സമീപത്തെ ജാതിക്ക തോട്ടത്തില്‍ നിന്നും നാട്ടുകാര്‍ കണ്ടെത്തിയത്.