കോട്ടയം: കോട്ടയം കടുത്തുരുത്തിയില്‍ കാലപ്പഴക്കം ചെന്ന വൈദ്യുതി കമ്പി പൊട്ടി വീണ് ബൈക്ക് യാത്രിക മരണപ്പെട്ടു. ഇവര്‍ക്കൊപ്പമുണ്ടായിരുന്ന ഭര്‍ത്താവിനും മകള്‍ക്കും പൊള്ളലേറ്റു. ഇരുവരും ഇപ്പോള്‍ ചികിത്സയിലാണ്. കടുത്തുരുത്തി പൂഴികോല്‍ ഉള്ളാടംകുന്നേല്‍ പ്രശാന്തിന്റെ ഭാര്യ രശ്മിയാണ് മരിച്ചത്. പ്രശാന്തും മകള്‍ പതിനേഴ് വയസുകാരി അഭിമന്യയുമാണ് ഇപ്പോള്‍ ചികിത്സയിലുള്ളത്.
ഞായറാഴ്ച വൈകുന്നേരം നാല് മണിയോടെയാണ് സംഭവം. ആപ്പാഞ്ചിറ കീഴൂര്‍ റോഡിലാണ് അപകടം സംഭവിച്ചത്. മകള്‍ അഭിമന്യക്കു ചെരിപ്പ് വാങ്ങി വീട്ടിലേക്ക് മടങ്ങവെയാണ് രശ്മിയെ വിധി തട്ടിയെടുത്തത്. റോഡിനു കുറുകെ സ്ഥാപിച്ചിരുന്ന വൈദ്യുതി കമ്പി പൊട്ടി ദേഹത്ത് പതിക്കുകയായിരുന്നു. സ്‌കൂട്ടര്‍ സഹിതം പത്തിടയിലേറെ താഴ്ചയില്‍ പാടത്തേക്കു മൂവരും തെറിച്ചു വീണു.
ഇതിനിടെ രശ്മിയുടെ കൈയില്‍ വൈദ്യുതി ലൈന്‍ കുടുങ്ങി. പ്രശാന്തും മകള്‍ അഭിമന്യയും പാടത്ത് കൂട്ടിയിരുന്ന മണ്‍കൂനയിലേയ്ക്കാണ് വീണത്. എന്നാല്‍ രശ്മി വീണതാകട്ടെ വെള്ളക്കെട്ടിലേയ്ക്കും. അപകടം കണ്ട ഉടനെ സമീപവാസി ട്രാന്‍സ്‌ഫോമറിന്റെ ഫ്യൂസ് ഊരി. പിന്നീടാണ് രക്ഷാപ്രവര്‍ത്തനം നടത്തിയത്.
ഉടനെ തന്നെ രശ്മിയെ ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല. കാലപ്പഴക്കം ചെന്ന വൈദ്യുതി കമ്പികളിലേക്ക് ശക്തമായ കാറ്റിലും മഴയിലും വാഴകള്‍ മറിഞ്ഞ് വീണിരുന്നു. ഇതാണ് അപകടത്തിനിടയാക്കിയതെന്നാണ് വൈദ്യുതി വകുപ്പ് നല്‍കുന്ന വിശദീകരണം.