പെരുമ്പാവൂര്‍: റോങ് സൈഡിലൂടെ കയറി മറികടക്കാന്‍ ശ്രമിച്ച കെഎസ്ആര്‍ടിസിയെ ചട്ടം പഠിപ്പിച്ച് ഈ ധൈര്യശാലി എന്ന കുറിപ്പോടെ സോഷ്യല്‍മീഡിയയില്‍ വൈറലായ വീഡിയോയുടെ സത്യസ്ഥിതി വെളിപ്പെടുത്തി ദൃക്‌സാക്ഷിയുടെ കുറിപ്പ്. കെഎസ്ആര്‍ടിസി കുമളി എന്ന ഫേസ്ബുക്ക് പേജിലാണ് കുറിപ്പ് പങ്കുവെച്ചിരിക്കുന്നത്.
കഴിഞ്ഞ ദിവസമാണ് കെഎസ്ആര്‍ടിസി ബസിനെ ചട്ടം പഠിപ്പിച്ച് യുവതി എന്ന തലത്തില്‍ വീഡിയോ വ്യാപകമായി ഷെയര്‍ ചെയ്യപ്പെട്ടത്. എന്നാല്‍ ഇത് അവസാന ഭാഗം മാത്രമാണെന്നാണ് ദൃക്‌സാക്ഷി പറയുന്നത്. ”ഒരു പെണ്ണ് എന്ത് ചെയ്താലും അത് വൈറലാക്കാന്‍ നടക്കുന്ന മഹത് വ്യക്തികള്‍ (സോഷ്യല്‍ മീഡിയയിലെ കോമാളികള്‍) ഇതൊന്ന് വായിക്കണം.
നിങ്ങള്‍ കണ്ടത് കഥയുടെ അവസാന ഭാഗം മാത്രം”- എന്നാണ് കുറിപ്പില്‍ പറയുന്നത്. സംഭവം നേരില്‍ കണ്ട ഒരാളു പോലും യുവതിയെ പിന്തുണയ്ക്കില്ലെന്നും എല്ലാം ക്ഷമിച്ച് മുന്‍പോട്ട് മിണ്ടാതെ പോയ ഡ്രൈവര്‍ ചേട്ടനാണ് പൂര്‍ണ്ണ പിന്തുണയെന്നും അദ്ദേഹം കുറിക്കുന്നുണ്ട്.
ഫേസ്ബുക്ക് പോസ്റ്റിന്റെ പൂര്‍ണ്ണ രൂപം;
കഴിഞ്ഞ ദിവസം പെരുമ്പാവൂര്‍ KSRTC സ്റ്റാന്റിനു സമീപം ഒരു യുവതി KSRTC ബസിനു വട്ടം വെച്ചോണ്ടിരിക്കുന്ന വീഡിയോയുടെ സത്യാവസ്ഥ ആരെങ്കിലും തിരക്കിയോ ? ഒരു പെണ്ണ് എന്ത് ചെയ്താലും അത് വൈറലാക്കാന്‍ നടക്കുന്ന മഹത് വ്യക്തികള്‍ (സോഷ്യല്‍ മീഡിയയിലെ കോമാളികള്‍) ഇതൊന്ന് വായിക്കണം. നിങ്ങള്‍ കണ്ടത് കഥയുടെ അവസാന ഭാഗം മാത്രം.
സംഭവം നടന്നത് പെരുമ്പാവൂര്‍ – വട്ടക്കാട്ടുപടി (old Muvattupuzha) റോഡില്‍ ആണ്. KSRTC ഓട്ടോ സ്റ്റാന്റിനു പുറകില്‍ ഉള്ള മുസ്ലീം പള്ളിയുടെ മുന്നില്‍ സ്‌കൂള്‍ കുട്ടികളെ ഇറക്കുന്നതിനായി ഒരു സ്‌കൂള്‍ ബസ് നിറുത്തിയിരുന്നു. സ്‌കൂള്‍ ബസിനു പുറകില്‍ കഥയിലെ വില്ലനായ (എന്റെ കാഴ്ചപ്പാടില്‍ നായകനായ) KSRTC ബസ് വന്നു നിന്നു. ചെറിയ കുട്ടികള്‍ ഇറങ്ങാന്‍ സമയം കൂടുതല്‍ എടുക്കും എന്നതുകൊണ്ട് സ്‌കൂള്‍ ബസ് ഡ്രൈവര്‍ സിഗ്‌നല്‍ കൊടുത്തതു കൊണ്ടാണ് KSRTC ബസ് സ്‌കൂള്‍ ബസിനെ ഓവര്‍ ടേക്ക് ചെയ്യാനായി വന്നത്. പകുതിക്ക് മുകളില്‍ സ്‌കൂള്‍ ബസിനെ മറി കടന്ന KSRTC ബസിന്റെ മുന്നിലാണ് ഈ അഭ്യാസപ്രകടനം. ഇതിനിടയില്‍ സ്‌കൂള്‍ ബസ് ഇടതു വശത്തുകൂടെ കടന്നുപോവുകയും ചെയ്തു. ഒരിക്കലും ആ KSRTC ബസ് ഓവര്‍ സ്പീഡില്‍ അല്ലായിരുന്നു. ഏതൊരു വാഹനവും മറ്റൊരു വാഹനത്തെ ഓവര്‍ ടേക്ക് ചെയ്തു കയറി വരുമ്പോള്‍ എതിരെ വരുന്ന ശരാശരി മല്ലൂ ഡ്രൈവേഴ്‌സ് സ്വയം സ്പീഡോന്നു കൂട്ടി വെച്ചു കൊടുക്കും. Cheap complex. അതു തന്നെയാണ് ഇവിടേയും സംഭവിച്ചത് എന്നൊന്നും ഞാന്‍ പറയില്ല. യാദൃശ്ചികമായി സംഭവിച്ചതായിരിക്കാം.
റോഡില്‍ പരസ്പരം വിട്ടുവീഴ്ച ചെയ്യണം. ഇല്ലെങ്കില്‍ ചിലപ്പോള്‍ ഇറച്ചിയില്‍ മണ്ണു പറ്റും.
ഈ സംഭവം നേരില്‍ കണ്ട ഒരാള്‍ പോലും ആ സ്ത്രീ ചെയ്തതിനെ പൂര്‍ണമായി അംഗീകരിക്കില്ല.
എല്ലാ KSRTC ഡ്രൈവേഴ്‌സും ചെയ്യുന്നത് ശരിയെന്ന് ഞാന്‍ അവകാശപ്പെടുന്നില്ല. പക്ഷേ ഈ സംഭവത്തില്‍ ആ KSRTC ഡ്രൈവര്‍ മാന്യനാണ്. അ good driver. മാന്യമായി ജോലി ചെയ്ത ഒരാളെയാണ് ഒറ്റ ദിവസം കൊണ്ട് സോഷ്യല്‍ മീഡിയ കരിവാരിത്തേച്ചത്. ഡ്രൈവറ് ചേട്ടന് ഫുള്‍ സപ്പോര്‍ട്ട്
എന്ന്, ദൃക്‌സാക്ഷി Ksrtc Auto stand Perumbavoor ക്രെഡിറ്റ്:shinz mathew ??
Discussion about this post