തിരുവനന്തപുരം: ബീഡി വാങ്ങി നല്‍കാന്‍ വിസമ്മതിച്ചത് പോലീസുകാരനെ വിലങ്ങുകൊണ്ട് മര്‍ദ്ദിച്ച് തടവുപ്പുള്ളി. കോടതിയില്‍ ഹാജരാക്കാന്‍ കൊണ്ടു വന്നപ്പോഴാണ് ഈ സംഭവം നടന്നത്. വിലങ്ങുകൊണ്ട് കഴുത്തിന് മര്‍ദ്ദനമേറ്റ പോലീസുകാരന്‍ ജനറല്‍ ആശുപത്രിയില്‍ ചികിത്സയിലാണ്.
നന്ദാവനം എആര്‍ ക്യാംപിലെ പോലീസ് ഉദ്യോഗസ്ഥനായ നന്ദകുമാറിനാണ് പരിക്കേറ്റത്. കാഞ്ഞിരംകുളം സ്വദേശി ഷിബുവാണ് നന്ദകുമാറിനെ വിലങ്ങ് കൊണ്ട് മര്‍ദ്ദിച്ചത്.
പൂജപ്പുര സെന്‍ട്രല്‍ ജയിലില്‍ തടവിലായിരുന്ന ഷിബുവിനെ കഴിഞ്ഞ ദിവസം വഞ്ചിയൂര്‍ കോടതിയില്‍ ഹാജരാക്കിയിരുന്നു. ഇതിന് ശേഷം തിരിച്ച് ജയിലിലേക്ക് പോകുമ്പോഴാണ് പ്രതി ബീഡി വാങ്ങി നല്‍കാന്‍ ആവശ്യപ്പെട്ടത്. എന്നാല്‍ ഇതിന് വിസമ്മതിച്ച നന്ദകുമാറിനെ പ്രതി വിലങ്ങ് ഉപയോഗിച്ച് കഴുത്തില്‍ ഇടിക്കുകയായിരുന്നു. സംഭവത്തില്‍ വഞ്ചിയൂര്‍ പോലീസ് കേസെടുത്തു.