പാലക്കാട്: കഴിഞ്ഞ ദിവസങ്ങളിലായി സമൂഹമാധ്യമങ്ങളില്‍ വിവാദമായി നിറയുന്ന ഒന്നാണ് പികെ ശശി എംഎല്‍എയുടെ ഒരു ശകാരം. ലോറി ഡ്രൈവറോട് അടിച്ച് കണ്ണ് പൊട്ടിക്കുമെന്നാണ് അദ്ദേഹം പറഞ്ഞത്. ഈ ദൃശ്യങ്ങള്‍ എടുത്ത് വിവാദം സൃഷ്ടിക്കാന്‍ ശ്രമിക്കുകയാണ് ഒരു പക്ഷം. എന്നാല്‍ സംഭവത്തിലെ നിജസ്ഥിതി വെളിപ്പെടുത്തി രംഗത്ത് വന്നിരിക്കുകയാണ് ലോറി ഡ്രൈവര്‍.
തെറ്റ് പറ്റിയതിന് എംഎല്‍എ തന്നെ ഉപദേശിച്ചതാണെന്നാണ് ടിപ്പര്‍ ലോറി ഡ്രൈവര്‍ പറയുന്നത്. ചെര്‍പ്പുളശ്ശേരി മാങ്ങോട്ട് വെച്ചാണ് സംഭവം. പികെ ശശി എംഎല്‍എ, ടിപ്പര്‍ ലോറി തടഞ്ഞു നിര്‍ത്തി ഡ്രൈവറോട് കയര്‍ക്കുകയാണ് ചെയ്തത്.
അമിത വേഗത്തില്‍ വന്ന ടിപ്പര്‍, എംഎല്‍എയുടെ വാഹനത്തെ അപകടകരമായ രീതിയില്‍ മറികടന്നതാണ് സംഭവങ്ങളുടെ ആധാരം. എന്നാല്‍ വീഡിയോ സമൂഹമാധ്യമങ്ങളില്‍ ഏറ്റെടുത്ത് വ്യാപകമായി പ്രചരിക്കുകയായിരുന്നു. ടിപ്പര്‍ ഡ്രൈവര്‍ ഇഖ്ബാല്‍ ആണ് വിശദീകരണം നല്‍കിയിരിക്കുന്നത്. തെറ്റ് തനിക്കാണ് പറ്റിയതെന്നും എംഎല്‍എ ഉപദേശിച്ചതാണെന്നും ഇഖ്ബാല്‍ കൂട്ടിച്ചേര്‍ത്തു. ആ ദൃശ്യങ്ങള്‍ വിവാദമായി ചിത്രീകരിക്കരുതെന്നും ഇഖ്ബാല്‍ പറയുന്നു.