കൊല്ലം: മന്ത്രി മാത്യു ടി തോമസിന്റെ ഗണ്‍മാന്‍ സുജിത്തിന്റെ മരണം ആത്മഹത്യ. സ്വയം ജീവത്യാഗം ചെയ്യാനുള്ള കാരണം പ്രണയനൈരാശ്യമെന്ന് റിപ്പോര്‍ട്ട്. സുജിത്തിന്റെ മൃതദേഹത്തിന് സമീപത്ത് നിന്നും ആത്മഹത്യാകുറിപ്പ് ലഭിച്ചു. ഇതിലാണ് ഇക്കാര്യം സൂചിപ്പിച്ചിരിക്കുന്നത്.
സുജിത്ത് കടയ്ക്കലിന് അടുത്ത് കോട്ടുക്കലില്‍ തന്നെയുള്ള ഒരു പെണ്‍കുട്ടിയുമായി ഏറെ നാളായി പ്രണയത്തിലായിരുന്നു. ഇരുവരും ഒന്നിച്ച് ജീവിക്കുമെന്നായിരുന്നു തീരുമാനം. എന്നാല്‍ വീട്ടുകാരുടെ എതിര്‍പ്പിനെ തുടര്‍ന്ന് പെണ്‍കുട്ടി ഇതില്‍ നിന്നും പിന്മാറി. ഇതു മൂലമുള്ള മനോവിഷമത്തിലാണ് സുജിത്ത് ആത്മഹത്യ ചെയ്തത് എന്നാണ് പോലീസ് നല്‍കുന്ന വിവരം.
ആത്മഹത്യാ കുറിപ്പിലൂടെ സുജിത്ത് പറയുന്നത്….
‘അവളില്ലാത്ത ഒരു ജീവിതം സങ്കല്‍പ്പിക്കാന്‍ കൂടി കഴിയുന്നില്ല. എല്ലാ എതിര്‍പ്പുകളും മറികടന്ന് എന്റെ ഒപ്പം വരുമെന്ന് പറഞ്ഞിട്ടും അവസാനം എന്നെ അവഗണിച്ചു കളഞ്ഞു. അവളില്ലാത്ത ജീവിതം ഇനി എനിക്ക് വേണ്ട’.
കഴിഞ്ഞ ആഴ്ച പെണ്‍കുട്ടിയുടെ വിവാഹ നിശ്ചയം കഴിഞ്ഞിരുന്നു. ഇതിനെ തുടര്‍ന്ന് സുജിത്ത് മാനസികമായി ഏറെ തകര്‍ന്നു പോയിരുന്നതായി സുഹൃത്തുക്കള്‍ പോലീസിനോട് പറഞ്ഞു.
27 കാരനായ സുജിത്ത് കടയ്ക്കല്‍ ചരിപ്പറമ്പ് സ്വദേശിയാണ് . ഇന്നലെ അര്‍ദ്ധ രാത്രിയിലാണ് സംഭവം നടന്നതെന്നാണ് പോലീസ് നിഗമനം. മാതാപിതാക്കള്‍ താഴത്തെ നിലയിലെ മുറിയിലായിരുന്നു. മുകള്‍ നിലയിലായിരുന്നു സുജിത്തിന്റെ കിടപ്പു മുറി. ആത്മഹത്യാ കുറിപ്പെഴുതിവെച്ചതിന് ശേഷം സുജിത്ത് ആത്മഹത്യ ചെയ്തത് രണ്ടു കൈകളിലെയും ഞെരമ്പ് മുറിച്ച ശേഷം സര്‍വീസ് റിവോള്‍വര്‍ കൊണ്ട് തലയ്ക്കു വെടിവച്ചാണ്. വെടിവയ്ക്കുന്ന സമയം ശബ്ദം പുറത്ത് കേട്ടിരുന്നില്ല എന്നാണ് വീട്ടുകാര്‍ പറയുന്നത്.
രാത്രിയായിരുന്നതിനാലും മുകള്‍ നിലയില്‍ വച്ചായതിനാലുമാണ് ശബ്ദം പുറത്ത് കേള്‍ക്കാതിരുന്നതായാണ് പോലീസ് നിഗമനം. അതേ സമയം സര്‍വ്വീസ് റിവോള്‍വര്‍ വീട്ടില്‍ കൊണ്ടു പോയതില്‍ ഗുരുതര വീഴ്ച്ചയാണ് സംഭവിച്ചിരിക്കുന്നത്. ഇത് സംബന്ധിച്ച് പോലീസ് അന്വേഷണം ആരംഭിച്ചിരിക്കുകയാണ്. തിരുവനന്തപുരം എആര്‍ ക്യാമ്പിലെ പോലീസുകാരനായിരുന്ന സുജിത്ത് കഴിഞ്ഞ ദിവസമാണ് ജോലിയില്‍ നിന്നും ലീവ് എടുത്ത് വീട്ടില്‍ എത്തിയത്.
തിരുവനന്തപുരം സിറ്റി എആര്‍ ക്യാമ്പിലെ സിവില്‍ പോലീസ് ഓഫീസറായ സുജിത്ത് രണ്ട് വര്‍ഷമായി മന്ത്രിയുടെ ഗണ്‍മാനായി പ്രവര്‍ത്തിച്ച് വരികയായിരുന്നു.മൃതദേഹം കൂടുതല്‍ പരിശോധനകള്‍ക്കായി ഉടന്‍ തന്നെ തിരുവനന്തപുരം മെഡിക്കല്‍ കോളേജിലേക്ക് മാറ്റും. മൃതദേഹം കടയ്ക്കല്‍ താലൂക്ക് ആശുപത്രിയില്‍ സൂക്ഷിച്ചിരിക്കുകയാണ് ഇപ്പോള്‍.
Discussion about this post