കൊല്ലം: വര്‍ഷങ്ങളായുള്ള ശത്രുതയ്‌ക്കൊടുവില്‍ അല്‍വാസി യുവാവിനെ കറന്റ് അടിപ്പിച്ച് കൊലപ്പെടുത്തി. ഇന്നലെ രാത്രി 10 ഓടെയായിരുന്നു സംഭവം. കൊട്ടിയം പറക്കുളം വയലില്‍ പുത്തന്‍ വീട്ടില്‍ അനില്‍കുമാറിന്റെ മകന്‍ ബിനുവിനെയാണ് ദാരുണമായി കൊലപ്പെടുത്തിയത്. അയല്‍വാസി വിജയനെ കൊട്ടിയം പോലീസ് അറസ്റ്റ് ചെയ്തു.
മദ്യപാനിയായ ബിനു വിജയന്റെ വീട്ടിലെത്തി പ്രശ്‌നങ്ങള്‍ സൃഷ്ടിക്കാറുണ്ട്. ഇന്നലെ സംഭവത്തിന് അര മണിക്കൂര്‍ മുമ്പ് വിജയന്റെ വീട്ടിലെത്തി ഭീഷണി മുഴക്കി വീണ്ടും വരുമെന്ന് അറിയിച്ച് മടങ്ങി. ഈ സമയം വിജയന്‍ ഇലക്ട്രിക് വയറിലൂടെ വൈദ്യുതി കടത്തിവിട്ട് ഇന്‍സുലേഷന്‍ ടേപ്പ് ഇളക്കി വീടിന്റെ മുന്‍വശത്ത് തൂക്കിയിട്ടു. വീണ്ടും എത്തിയ ബിനു വയറില്‍ പിടിച്ചതോടെ ഷോക്കേറ്റ് നിലത്ത് വീണു. മദ്യ ലഹരിയില്‍ വീണതാണെന്ന് വിജയന്‍ പറഞ്ഞതനുസരിച്ച് ബിനുവിന്റെ മാതാപിതാക്കളും വിജയന്റെ ഭാര്യയും ചേര്‍ന്ന് ബിനുവിനെ താങ്ങിയെടുത്ത് വീട്ടില്‍ കൊണ്ടുപോയി കിടത്തി.
അനക്കമില്ലാതിരുന്ന ബിനുവിന് പിന്നീട് ബോധം വരുമെന്നായിരുന്നു പ്രതീക്ഷ. എന്നാല്‍ പുലര്‍ച്ചെ നോക്കിയപ്പോള്‍ ബിനു മരിച്ചതായി വീട്ടുകാര്‍ക്ക് ബോധ്യമായി. തലയ്ക്ക് പിന്നിലെ മുറിവില്‍ നിന്ന് രക്തം വാര്‍ന്നതായും കണ്ടെത്തി. വീട്ടുകാര്‍ വിവരം അറിയിച്ചതിനെ തുടര്‍ന്ന് കൊട്ടിയം സിഐ ജി അജയനാഥിന്റെ നേതൃത്വത്തില്‍ പോലീസെത്തി വിജയനെ ചോദ്യം ചെയ്തതോടെയാണ് കറന്റടിപ്പിച്ചാണ് കൊലപ്പെടുത്തിയതെന്ന വിവരം പുറത്തായത്.
എന്നാല്‍ ഇങ്ങനെ കൊല്ലാന്‍ ശ്രമിക്കുന്നത് ആദ്യത്തെ സംഭവമല്ലെന്നും പല തവണ ബിനുവിനായി കെണി ഒരുക്കിയെന്നും വിജയന്‍ സമ്മതിച്ചു. എന്നാല്‍ വിജയന്‍ മനോരോഗത്തിന് മരുന്ന് കഴിക്കുന്നുണ്ടെന്ന് ഭാര്യ പോലീസിനോട് പറഞ്ഞു.
Discussion about this post