ദിസ്പൂര്‍: ഓട്ടോയില്‍ സഞ്ചരിക്കുകയായിരുന്ന മുസ്‌ലിംകളെ തടഞ്ഞുനിര്‍ത്തി മര്‍ദ്ദിച്ച് ജയ്ശ്രീറാം വിളിക്കാന്‍ പറഞ്ഞതായി പരാതി. ഹിന്ദു സംഘടനാ പ്രവര്‍ത്തകര്‍ക്കെതിരെ ഓള്‍ അസം മൈനോരിറ്റി സ്റ്റുഡന്‍സ് യൂണിയനും നോര്‍ത്ത് ഈസ്റ്റ് മൈനോരിറ്റി സ്റ്റുഡന്‍സ് യൂണിയനുമാണ് പരാതി നല്‍കിയത്. അസമിലെ ബാര്‍പേടയിലാണ് സംഭവം.
ഓട്ടോയില്‍ സഞ്ചരിക്കുകയായിരുന്ന മുസ്‌ലിംകളെ തടഞ്ഞുനിര്‍ത്തി കാരണമൊന്നുമില്ലാതെ മര്‍ദ്ദിക്കുകയായിരുന്നു. ഇവരെക്കൊണ്ട് നിര്‍ബന്ധിച്ച് ജയ് ശ്രീറാം, ഭാരത് മാതാ കീ ജയ്, പാകിസ്താന്‍ മൂര്‍ദാബാദ് എന്നിങ്ങനെ പറയിക്കുകയും ചെയ്തു.
ഹിന്ദു സംഘടനാ പ്രവര്‍ത്തകരെന്ന് അവകാശപ്പെട്ടായിരുന്നു സംഘത്തിന്റെ മര്‍ദ്ദനം. സംഭവത്തിന്റെ ദൃശ്യങ്ങള്‍ ക്യാമറയില്‍ പകര്‍ത്തിയ ആക്രമികള്‍ വീഡിയോ സോഷ്യല്‍ മീഡിയയില്‍ പോസ്റ്റ് ചെയ്തു. ഇതോടെയാണ് സംഭവം പുറംലോകമറിഞ്ഞത്. അക്രമികള്‍ക്കെതിരെ നടപടിയെടുക്കാന്‍ എസ്പിയോട് ആവശ്യപ്പെട്ടതായി സ്ഥലത്തെ കോണ്‍ഗ്രസ് എംഎല്‍എ അബ്ദുല്‍ ഖലീഖ് പറഞ്ഞു.