ന്യൂഡല്ഹി: ശുചീകരണപ്രവര്ത്തനങ്ങളില് ഏര്പ്പെട്ടിരിക്കുന്നതിനിടെ വീഡിയോകോണ് ടവറിന്റെ പത്താം നിലയില് നിന്നും താഴെ വീണ് രണ്ട് തൊഴിലാളികള് മരിച്ചു. രാജു ശര്മ(22), അഷ്തിയാഖ് ഖാന്(23) എന്നിവരാണ് മരിച്ചത്. തിങ്കളാഴ്ച വൈകിട്ട് മൂന്ന് മണിയോടെയായിരുന്നു അപകടം.
വീഡിയോകോണ് കെട്ടിടത്തിന്റെ പത്താംനിലയിലെ ചില്ല് വൃത്തിയാക്കുന്നതിനിടെയായിരുന്നു അപകടമുണ്ടായത്. പണിക്കിടെ ഇവര് നിന്നിരുന്ന സ്റ്റാന്ഡിന്റെ ചരട് പൊട്ടി രാജു ശര്മയും അഷ്തിയാഖ് ഖാനും താഴേക്ക് വീഴുകയായിരുന്നു. ഗുരുതരമായി പരിക്കേറ്റ ഇരുവരെയും ഉടന് തന്നെ ആശുപത്രിയില് പ്രവേശിപ്പിച്ചെങ്കിലും രക്ഷിക്കാനായില്ല.
ഹെല്മെറ്റ്, സേഫ്റ്റി ബെല്റ്റ് തുടങ്ങിയ സുരക്ഷാമാര്ഗങ്ങള് ഇവര് ഉപയോഗിച്ചിരുന്നില്ലെന്ന് പോലീസ് പറയുന്നു. ശുചീകരണപ്രവര്ത്തനത്തിന് കരാര് ഏറ്റെടുത്തിരുന്നത് എംഎസ് എന്റര്പ്രൈസസ് എന്ന സ്ഥാപനമാണ്. ഈ സ്ഥാപനത്തിനെതിരെ നടപടിയെടുത്തേക്കും.
Discussion about this post